A Seriyaning 10-turida Milan klubi "Inter" safarda "Verona" ustidan 2:1 hisobida g‘alaba qozondi. "Neradzurrilar"ga so‘nggi daqiqalarda Martin Frezening avtogoli yordam berdi, o‘yin durang bilan yakunlanishi kutilayotgan edi.
"Inter" o‘yinni faol boshladi va 16-daqiqada hisobni ochdi. Hakan Chalhanog‘lu tomonidan burchak to‘pidan amalga oshirilgan uzatmani Pitr Zelinski bir zarbada darvozaning yuqori burchagiga joyladi — 0:1.
Biroq "Verona" tez orada hisobni tenglashtirdi. 40-daqiqada Jovanni Bradarichning pasini aniq zarba bilan uzoq burchakka yo‘lladi — 1:1.
Mezbonlar o‘ziga ishonchni oshirib, birinchi bo‘lim oxirida Gift Orban orqali ustunlikni qo‘lga kiritishga yaqin bo‘ldi, biroq uning zarbasi ustunga tegdi. Tanaffusga jamoalar durang natija bilan chiqishdi.
Ikkinchi bo‘limda "Inter" murabbiyi Kristian Kivu Barella, Dumfris va Esposito kabi futbolchilarni maydonga tushirib, hujumni kuchaytirdi. Milan klubi to‘liq tashabbusni qo‘lga oldi, ammo "Verona" himoyasini uzoq vaqt yorib o‘ta olmadi.
So‘nggi daqiqalarda mehmonlar bosimni kuchaytirib, raqibni xatoga majbur qildi. Barellaning chap qanotdan uzatgan to‘pi himoyachi Martin Freze tomonidan o‘z darvozasiga yo‘naltirildi — 1:2.
Qo‘shib berilgan vaqtda "Inter" hisobni saqlab qoldi va muhim uch ochkoni qo‘lga kiritdi. Yakunda "Inter" ochkolarini 21 taga yetkazib, vaqtinchalik uchinchi o‘ringa ko‘tarildi va peshqadamlardan oradagi farqni qisqartirdi.
"Verona" esa yaxshi o‘yin ko‘rsatganiga qaramay, mag‘lubiyatga uchradi va quyi ligaga tushish zonasida qoldi. Kristian Kivu shogirdlari bu g‘alaba bilan skudetto uchun kurashda pozitsiyasini mustahkamlashda davom etmoqda.
