Yevropa futbolida qishki transferlar oynasi yaqinlashar ekan, ikki ulkan klub — "Manchester Siti" va "Real" o‘rtasida qiziqarli hamkorlik ehtimoli muhokama markaziga chiqdi. Madridliklar jamoa himoya chizig‘ida yuzaga kelgan jiddiy muammolarni tezkor hal etish uchun turli variantlarni ko‘rib chiqmoqda.
Avvalroq “Qirollik klubi” jarohatlar tufayli yuzaga kelgan inqirozdan chiqish yo‘li sifatida “shaharliklar” safida zaxirada qolib ketgan iqtidorli o‘zbek himoyachisi Abduqodir Husanovni ijaraga olish masalasini ko‘targan edi. Biroq mutaxassislar fikricha, 21 yoshli futbolchining salohiyati juda yuqori bo‘lgani sababli “Manchester Siti” uni osongina qo‘yib yuborishga tayyor emas.
Shu sababli ingliz grandi madridliklarga muqobil variantni taklif qilmoqda. Gap tajribali niderlandiyalik himoyachi Natan Ake haqida ketmoqda. Uning Pep Gvardiola jamoasidagi kelajagi hozircha noaniq. Ayniqsa, Niderlandiya terma jamoasi murabbiylar shtabi Akening 2026 yilgi jahon chempionatida ishtirok etishi uchun undan muntazam o‘yin amaliyoti talab qilinmoqda.
Bu talabdan so‘ng 30 yoshli himoyachi yangi klub qidirishga kirishdi va “Manchester Siti” uni yanvar oyi transfer oynasida sotuvga qo‘yishga tayyor. Vujudga kelgan vaziyatdan kelib chiqib, “shaharliklar” Akening xizmatlarini “Real”ga taklif etmoqda.
Bu haqda Defensa Central nashri xabar tarqatdi. Manbaga ko‘ra, manchesterliklar tajribali himoyachi uchun 30 million yevro atrofida mablag‘ ishlab olishni maqsad qilgan. Biroq bu summa “Qirollik klubi” rahbariyatini unchalik qoniqtirayotgani yo‘q.
Chunki “Real” o‘zining 2026 yilga mo‘ljallangan transfer strategiyasida katta maosh talab qiladigan, yoshi katta yulduzlardan ko‘ra, jamoaga uzoq muddat xizmat qila oladigan yosh va istiqbolli futbolchilarga ustuvor ahamiyat qaratmoqda.
Ayni paytda Akening taqdiri atrofida yana bir jiddiy raqib paydo bo‘ldi. Madridliklarning ashaddiy raqibi "Barselona" ham himoya chizig‘idagi muammolar sababli niderlandiyalik himoyachiga jiddiy qiziqish bildirmoqda. Kataloniya klubida ham malakali himoyachilar yetishmasligi sezilmoqda.
Ma’lumot uchun, Natan Ake 2020 yil yozidan beri “Manchester Siti” sharafini himoya qilib keladi. Uning klub bilan amaldagi shartnomasi 2027 yil 30 iyunga qadar mo‘ljallangan. Transfermarkt ma’lumotlariga ko‘ra, futbolchining bozor qiymati hozirda 18 million yevro atrofida baholanmoqda.
Qisqasi, qishki transfer oynasi yaqinlashgan sari “Real”, “Manchester Siti” va “Barselona” o‘rtasidagi ushbu transfer uchburchagi yanada qizib, muxlislar uchun yangi intrigalarni taqdim etishi aniq.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
