Disney kompaniyasi 2025 moliyaviy yili yakunlariga ko‘ra, Stich qahramoni aks etgan turli litsenziyali mahsulotlar savdosidan 4 milliard dollardan ortiq daromad oldi. Bu haqda DTF nashri xabar bermoqda.
Ma’lumotlarga ko‘ra, Stichga bo‘lgan qiziqishning keskin o‘sishi «Lilo va Stich» remeykining katta tijoriy muvaffaqiyati bilan bevosita bog‘liq. Film jahon prokatida 1,04 milliard dollar yig‘ib, yilning eng daromadli loyihalaridan biriga aylandi. Kompaniya bosh direktori Bob Ayger ta’kidlashicha, ushbu kartina Disney+ platformasida original animatsion filmga ham qiziqishni sezilarli darajada oshirgan.
Aygerning so‘zlariga ko‘ra, merchandayzing bugungi kunda faqat savdo vositasi emas, balki kontent, muxlislar hissiyoti va Disney’ning tematik parklarida yaratilgan taassurotlarni bir-biriga bog‘lab turadigan muhim ekotizim qismi hisoblanadi.
Shu jarayon fonida Stich Disney’ning marketing kampaniyalari va ijtimoiy loyihalarida ham tobora ko‘proq ko‘zga tashlanmoqda. Jumladan, 2025 yilda u ilk bor Disney Holiday Magic Tour xayriya turida Mikki Maus o‘rnini egalladi. Ushbu yillik tashabbus doirasida kompaniya xayriya mablag‘lari yig‘ib, bolalarga sovg‘alar tarqatadi va muxlislar uchun turli tadbirlar o‘tkazadi.
Bundan tashqari, dekabr oyi boshida Stich Brodvey sahnasida ham ilk bor paydo bo‘ldi. «Aladdin» myuzikli namoyishi yakunida u sahnaga chiqib, “A Whole New World” qo‘shig‘ini ijro etdi hamda tomoshabinlarni Toys for Tots jamg‘armasi uchun o‘yinchoqlar ehson qilishga undadi.
Shu tariqa, Stich nafaqat ekranda, balki tijorat va ijtimoiy maydonda ham Disney’ning eng qimmatli brendlaridan biriga aylanib bormoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
