Juma kuni Monako o'z maydonida Nantni qabul qildi va uchrashuv taqdirini birinchi bo'lim o'rtalaridagi atigi besh daqiqada hal qilib qo'ydi. Bu haqda euro-football.ru xabar beradi.
O'yin boshida monakoliklar bir nechta xavfli vaziyatlar yaratdi: Golovin hujumlarni markazdan davom ettirdi, Kayо Enrike va Balogun ishtirokidagi epizodlarda Nant darvozaboni bir necha bor jamoasini qutqarib qoldi. Burchak zarbalari va qanotlardan uzatmalar Monakoning bosimini yanada kuchaytirdi.
25-daqiqada Nant himoyasidagi xatodan so'ng Balogun to'pni olib qo'ydi, uning zarbasini darvozabon qaytardi, ammo Simon Adingra qaytgan to'pni bo'sh darvozaga yo'llab, hisobni ochdi — 1:0. Oradan ko'p o'tmay Golovin yakkama-yakka chiqib ketdi va Adingraga yana bir imkoniyat yaratib berdi — 2:0.
30-daqiqada Monako tezkor hujumda raqibni “to'rtga ikki” vaziyatida tutib oldi: Golovin sherigiga qulay pas uzatdi, Denis Zakariya esa aniq zarba bilan hisobni yiriklashtirdi — 3:0. Tanaffus oldida esa Nant chap qanotdan uzatma tashladi, Fabyen Sentonz jarima maydoni chetidan uchib kelgan to'pni bir urishda “to'qqizlik”ka joylab, farqni qisqartirdi — 3:1.
66-daqiqada Golovin hakam bilan bahs uchun ogohlantirildi, darhol uning ortidan hakamga qarsak chalgani sabab ikkinchi jazoni olib, maydondan chetlatildi. Yakunda Ansu Fati yakkama-yakka vaziyatga chiqdi, biroq Nant darvozaboni duelda ustun keldi.
G'alabadan so'ng Monako turnir jadvalida 7-o'rinda bormoqda, Nant esa quyi pog'onalarda — so'nggi o'rinlardan birida qolmoqda.
“Zamin”ni Telegramʻda oʻqing!
