Turkiyaning ikki yirik klubi — Galatasaray va Fenerbahche vakillari bo'lgan ikki futbolchi garov o'yinlarida qatnashgani uchun jinoiy javobgarlikka tortilishi va hatto qamoq jazosi olishi mumkin. Bu haqda euro-football.ru xabar beradi.
Gap Galatasaray futbolchisi Metehan Baltachi hamda Fenerbahche sardori Mert Hakan Yandash haqida ketmoqda. Ularning ishida og'ir ayblovlar ilgari surilmoqda: Baltachiga 13 yilgacha, Yandashga esa 17 yilgacha ozodlikdan mahrum etish xavfi bor.
Sabah nashri keltirgan ma'lumotlarga ko'ra, Baltachi kamida ikki marta Galatasaray o'yinlariga pul tikkan. U o'sha uchrashuvlarda asosiy tarkibda bo'lmagan, biroq jamoa qaydnomasiga kiritilgan. Bu esa futbolchi natijaga ta'sir o'tkazish imkoniyatiga ega bo'lganini anglatadi.
Amaldagi Turkiya qonunchiligiga muvofiq, professional sportchi tikish paytida o'z maqomini bukmekerlarga ma'lum qilishi shart edi. Biroq futbolchi buni bajarmagani qayd etilmoqda.
“Zamin”ni Telegramʻda oʻqing!
