Marcus Thuram va Kylian Mbappe Bavariya yulduzi Michael Olise ustidan kulishdi

Fransiya terma jamoasining yig‘inidan olingan video ijtimoiy tarmoqlarda katta qiziqish uyg‘otmoqda. Diqqat markazida esa Bavariya hujumchisi Michael Olise bo‘lib, u jamoadoshlari Marcus Thuram (Inter) va Kylian Mbappe (Real Madrid) tomonidan hazilomuz tarzda masxara qilindi. Bu haqda Goal.com xabar beradi.

Mashg‘ulot oldidan Marcus Thuram yuziga sochiq yoki muz to‘plami yopib olib, Michael Olise’ning o‘ziga xos odatini takrorladi. Ma’lumki, Olise Bavariya safida o‘yinlar oldidan ko‘pincha kepkasini ko‘zlarigacha tushirib yurishi yoki hatto Chempionlar ligasi doirasidagi PSJga qarshi bahsda yuzini sharf bilan to‘sib olgani bilan tanilgan edi.

Thuram maydon chimini qisqa muddat ko‘zdan kechirib, Olise’ning maydonni tezkor tekshirish odatini ham parodiya qildi. Buni kuzatib turgan Kylian Mbappe kulgidan o‘zini tiya olmadi. Olise esa bu hazillarga shunchaki charchagan nigoh va bosh chayqash bilan javob qaytardi.

O‘tgan mavsumda Bavariya bilan Germaniya chempionligi va kubogini qo‘lga kiritgan Olise, ayni damda Clairefontaine bazasida terma jamoa bilan shug‘ullanmoqda. Ballon d'Or sovriniga nomzod bo‘lgan futbolchi 2026-yilgi Jahon chempionatida Fransiya terma jamoasining asosiy yetakchilaridan biri bo‘lishi kutilmoqda.