Huawei kompaniyasi Xitoy smartfon bozorida o‘z ulushini Apple'ga nisbatan ikki baravarga oshirib, yetakchilikni qo‘lga kiritdi. Hozirgi kunda texnologik gigant mahalliy bozorning to‘rtdan bir qismini nazorat qilmoqda. Bu haqda Ixbt.com xabar beradi.
Joriy yilning 19-haftasi (4-10 may) yakunlariga ko‘ra, Huawei Pura 90 Pro modellari yuqori talab tufayli kompaniyani 25,55 foizlik bozor ulushi bilan birinchi o‘ringa olib chiqdi. Shuningdek, Enjoy 90 seriyasi, xususan Pro Max modifikatsiyasi, boshlang‘ich darajadagi smartfonlar segmentida iPhone 17 modellaridan sezilarli darajada ko‘proq sotilmoqda.
Bozorning ikkinchi pog‘onasini Oppo, OnePlus va realme brendlarini birlashtirgan Oppo kompaniyasi 15,83 foiz ulush bilan egalladi. Uchinchi o‘rinda 15,62 foiz ko‘rsatkich bilan Vivo va iQOO joylashgan bo‘lsa, Xiaomi (Redmi bilan birga) 14,49 foiz ulush bilan to‘rtinchi o‘rinda qayd etildi.
Apple kompaniyasi esa 13,08 foiz ulush bilan beshinchi o‘ringa tushib qoldi. Reytingning oltinchi pog‘onasini Honor brendi egallab turibdi. Tahlilchilar Huawei'ning muvaffaqiyatini innovatsion yechimlar va mahalliy iste’molchilarning brendga bo‘lgan yuqori ishonchi bilan izohlamoqda.
“Zamin”ni Telegramʻda oʻqing!
