NASA Spaceflight tomonidan e’lon qilingan videoda operator Starship raketasini uchirish maydonchasidagi Water Deluge System (WDS) tizimining yaqinida turgani aks etgan. Bu kuchli suv sovutish va shovqinni pasaytirish tizimi bo‘lib, u raketa parvozidan bir necha soniya oldin ishga tushadi. Sinov vaqtida maydoncha ostiga va uning atrofida ulkan hajmdagi suv purkaldiki, bu haqiqiy sharsharani eslatdi. Bu haqda Ixbt.com xabar beradi.
Ushbu tizim Super Heavy raketasidagi 33 ta Raptor dvigateli hosil qiladigan zarba to‘lqini, tebranish va o‘ta yuqori akustik bosimni yumshatish uchun mo‘ljallangan. Tizimsiz ishga tushirish jarayonidagi ulkan energiya start maydonchasi va infratuzilmaga jiddiy zarar yetkazishi mumkin edi. Videoda suv oqimi hosil qilgan qalin tuman va sachrashlar odamni butunlay yashirib qo‘yganini ko‘rish mumkin.
SpaceX yaqinlashib kelayotgan Starship parvozi oldidan tizimni sinchkovlik bilan sozlamoqda. Bo‘lajak parvozda Raptor 3 dvigatellari bilan jihozlangan yangi avlod Starship sinovdan o‘tkaziladi. Raptor 3 dvigatellari avvalgilariga qaraganda yuqori tortish kuchi, samaradorlik va soddalashtirilgan konstruksiyaga ega bo‘lib, ular Starship V3 tizimining ko‘p marotaba foydalanish imkoniyatini oshiradi.
Starship — bu Ilon Maskning SpaceX kompaniyasi tomonidan ishlab chiqilayotgan, to‘liq qayta foydalanish mumkin bo‘lgan o‘ta og‘ir raketa tizimidir. U yuklar va odamlarni Yer orbitasiga, Oyga hamda Marsga yetkazish uchun mo‘ljallangan. Hozirda mutaxassislar barcha tizimlarni navbatdagi parvozga tayyorlamoqda.
“Zamin”ni Telegramʻda oʻqing!
