Ilmiy maqolalar uchun moʻljallangan mashhur arXiv platformasi sunʼiy intellekt yordamida yaratilgan sifatsiz materiallarga qarshi qatʼiy choralar koʻrishini eʼlon qildi. Endilikda neyrotarmoq tomonidan yozilgan va inson tomonidan tekshirilmagan matnlar aniqlansa, mualliflar bir yil muddatga platformadan chetlatilishi mumkin. Bu haqda Ixbt.com xabar beradi.
ArXiv kompyuter fanlari boʻlimi rahbari Tomas Dietterichning soʻzlariga koʻra, maqola mazmuni uchun toʻliq javobgarlik muallif zimmasida qoladi. Agar matnda neyrotarmoqqa xos boʻlgan «hallutsinatsiyalar», uydirma havolalar, plagiat yoki modelning texnik izohlari (masalan, «200 soʻzli qisqacha mazmun yozing») aniqlansa, bu sanksiyalar uchun asos boʻladi.
Jazo chorasi sifatida bir yillik taqiqdan tashqari, qoidabuzarlar kelgusida oʻz maqolalarini faqat nufuzli ilmiy jurnal yoki konferensiya toʻplamlarida qabul qilinganidan keyingina arXiv platformasiga joylashtirishlari mumkin boʻladi. Platforma maʼmuriyati har bir holat ichki tekshiruvdan oʻtkazilishini va mualliflarga apellyatsiya berish huquqi saqlab qolinishini taʼkidladi.
ArXiv vakillari sunʼiy intellekt tufayli ilmiy muhitda «AI-axlat» muammosi keskinlashayotganini tan olmoqda. Katta til modellari (LLM) tufayli ilmiy yangilik keltirmaydigan, yuzaki va avtomatik tarzda yaratilgan matnlar oqimi koʻpaygan. Ushbu yangi cheklovlar akademik hamjamiyatdagi generativ sunʼiy intellekt bilan bogʻliq umumiy inqirozga qarshi kurashning bir qismidir.
“Zamin”ni Telegramʻda oʻqing!
