Россиянинг “Караван Инфо” ахборот агентлиги Ўзбекистонда экологик барқарорликни кучайтириш бўйича амалга оширилаётган кенг қамровли ислоҳотлар ҳақида мақола эълон қилди. Унда таъкидланишича, Президент Шавкат Мирзиёев раҳбарлигида ўтказилган махсус йиғилишда мамлакатда атроф-муҳит ҳолатини тубдан яхшилашга қаратилган учта улкан ташаббусга расман старт берилди.
Президент ташаббуслари — экотизимни қайта қуришнинг янги босқичи
Йиғилишда экология ва атроф-муҳитни муҳофаза қилиш соҳасидаги ишлар самарадорлигини янада ошириш, аҳоли саломатлиги ва ҳаёт сифатини яхшилаш асосий масала сифатида кўтарилди. Шу муносабат билан “Тоза ҳаво”, “Чиқиндисиз тоза Ўзбекистон” ва “Экомерос” каби стратегик лойиҳалар амалга жорий этилмоқда.
Ҳар бир лойиҳа мамлакатнинг экологик архитектурасини қайта шакллантиришга қаратилган бўлиб, уларда нафақат давлат органлари, балки хусусий сектор ҳам фаол иштирок этиши кўзда тутилган.
“Тоза ҳаво”: ифлосланишга қарши марказлашган кураш
Экология вазири Азиз Абдуҳакимов “Ўзбекистон 24” телеканалига маълум қилганидек, мазкур ташаббуснинг асосий устуни — мамлакатда ягона экологик мониторинг марказини ташкил этиш. Бу марказ ҳаво сифатини доимий ўлчаб боради ва ифлосланиш манбаларини аниқлашга ёрдам беради.
Шунингдек, биринчи ва иккинчи тоифадаги саноат корхоналари замонавий фильтрлар ва тозалаш иншоотлари билан жиҳозланади. Бу чора-тедбирлар қалин саноат зоналарида атмосферага чиқадиган зарарли моддалар ҳажмини сезиларли камайтиришга хизмат қилади.
“Чиқиндисиз тоза Ўзбекистон”: янги авлод чиқинди бошқарув тизими
Иккинчи лойиҳа мамлакатда чиқиндилар билан боғлиқ тизимни тубдан янгилашни мақсад қилади. Унинг доирасида чиқиндиларни йиғиш, саралаш, қайта ишлаш ва утилизация қилишнинг замонавий кластер моделлари жорий этилади. Президент хусусий бизнесни мазкур жараёнга жалб қилиш зарурлигини алоҳида таъкидлаган.
Мақсад — чиқиндиларни иқтисодий ресурсга айлантира оладиган узлуксиз ва самарали тизим яратиш.
“Экомерос”: табиат бойликларини асрашга бағишланган кенг қамровли дастур
Учинчи ташаббус — Ўзбекистоннинг ноёб табиий ҳудудларини муҳофаза қилиш, уларни ривожлантириш ва келгуси авлодларга асраб қолишга қаратилган. Лойиҳа доирасида қўриқхоналар, миллий боғлар, биосфера ҳудудлари ва махсус муҳофаза этиладиган табиий объектлар қайта тикланади, экотуризм инфратузилмаси ривожлантирилади.
Экологик мувозанатни сақлаш, жонзотлар хилма-хиллигини кўпайтириш ва ўрмон майдонларини кенгайтириш каби вазифалар ҳам асосий йўналишлардан бири сифатида қайд этилган.
Экологик сиёсат — келажакка қаратилган инвестиция
Мақолада таъкидланишича, ушбу уч йирик лойиҳа амалга оширилиши натижасида мамлакатда экологик хавфсизлик даражаси ошади, аҳоли учун соғлом ва тоза муҳит яратилади, ҳудудлар барқарор ривожланишга йўналтирилади.
Мутахассислар фикрича, бу ташаббуслар нафақат экологик, балки иқтисодий ва ижтимоий барқарорлик учун ҳам мустаҳкам замин бўлади.
Ўзбекистоннинг “яшил тараққиёт” стратегияси амалдаги қадамлар билан яна бир босқич юқорига кўтарилаётгани таъкидланади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
