Қозоғистон пойтахти Остона шаҳрида рўй берган воқеа аҳоли орасида катта ҳайрат уйғотди — қутқарувчилар ўзини баланд қаватдан ташламоқчи бўлган ёш қизни ҳаётга қайтариб қолишди. Бу ҳақда мамлакат Фавқулодда вазиятлар вазирлиги маълум қилди.
Маълумотларга кўра, ҳолат Иманбаева кўчасида жойлашган кўп қаватли турар-жойда юз берган. “112” ягона тезкор хизматига шахснинг ўз жонига қасд қилиш нияти ҳақида хабар келиб тушгач, қутқарувчилар бир неча дақиқа ичида манзилга етиб боришган.
Тезкор гуруҳ қўшни хонадон орқали юқори қаватга кириб борган ва қиз билан суҳбат ўтказа бошлаган. Суҳбат давомида ходимлар уни тинчлантиришга ва вазиятни назоратга олишга муваффақ бўлишган. Бир неча дақиқа давом этган мураккаб жараёндан сўнг, қизни хавфсиз томонга тортиб олишди.
Ҳозирда қутқарилган ёш аёлнинг ҳаёти хавфсиз ҳолатда экани маълум қилинди. У шифокорлар ва психологлар назоратига топширилган. Ҳодисанинг келиб чиқиш сабаблари аниқланмоқда.
Фавқулодда вазиятлар вазирлиги фуқароларни бундай ҳолатларда бефарқ қолмасликка ва эҳтимолий хавф ҳолатларини зудлик билан “112” рақами орқали хабар қилишга чақирди.
“Zamin”ни Telegram'да ўқинг!
