Qozog‘iston poytaxti Ostona shahrida ro‘y bergan voqea aholi orasida katta hayrat uyg‘otdi — qutqaruvchilar o‘zini baland qavatdan tashlamoqchi bo‘lgan yosh qizni hayotga qaytarib qolishdi. Bu haqda mamlakat Favqulodda vaziyatlar vazirligi ma’lum qildi.
Ma’lumotlarga ko‘ra, holat Imanbayeva ko‘chasida joylashgan ko‘p qavatli turar-joyda yuz bergan. “112” yagona tezkor xizmatiga shaxsning o‘z joniga qasd qilish niyati haqida xabar kelib tushgach, qutqaruvchilar bir necha daqiqa ichida manzilga yetib borishgan.
Tezkor guruh qo‘shni xonadon orqali yuqori qavatga kirib borgan va qiz bilan suhbat o‘tkaza boshlagan. Suhbat davomida xodimlar uni tinchlantirishga va vaziyatni nazoratga olishga muvaffaq bo‘lishgan. Bir necha daqiqa davom etgan murakkab jarayondan so‘ng, qizni xavfsiz tomonga tortib olishdi.
Hozirda qutqarilgan yosh ayolning hayoti xavfsiz holatda ekani ma’lum qilindi. U shifokorlar va psixologlar nazoratiga topshirilgan. Hodisaning kelib chiqish sabablari aniqlanmoqda.
Favqulodda vaziyatlar vazirligi fuqarolarni bunday holatlarda befarq qolmaslikka va ehtimoliy xavf holatlarini zudlik bilan “112” raqami orqali xabar qilishga chaqirdi.
“Zamin”ni Telegramʻda oʻqing!
