Тошкент шаҳрида ҳайдовчилар учун муҳим эълон қилинди. 2 майдан 11 майгача пойтахт марказидаги қатор кўчаларда транспорт ҳаракати вақтинча чекланади.
Маълум қилинишича, мазкур чекловлар Tashkent Flowers Fest — 2026 гуллар фестивали ўтказилиши муносабати билан жорий этилмоқда. Тадбир Ўзбекистон Миллий кутубхонаси олдидаги майдонда 7–9 май кунлари бўлиб ўтади.
Ҳокимлик ахборотига кўра, фестивалга тайёргарлик ва уни ўтказиш давомида қуйидаги ҳудудларда транспорт воситалари ҳаракати чекланади:
- Зарафшон кўчасининг Hyatt Regency Tashkent яқинидан Мустақиллик шоҳ кўчасигача бўлган қисми;
- Истиқлол кўчасининг Амир Темур шоҳ кўчаси ва Буюк Турон кўчаси оралиғидаги қисми;
- Буюк Турон кўчасининг Истиқлол кўчаси кесишмасидан Ёшлар ижод саройигача бўлган қисми.
Мутасаддилар ҳайдовчилардан ушбу кунларда ҳаракат йўналишларини олдиндан режалаштиришни сўрамоқда. Альтернатив йўллардан фойдаланиш орқали тирбандликларнинг олдини олиш мумкин.
Фестиваль доирасида пойтахтда гуллар кўргазмалари, маданий тадбирлар ва турли томошалар ташкил этилиши кутилмоқда.
