Илон Маск Калифорния федерал судида xAI компанияси рақобатчиларнинг моделларини дистиллятсия қилиш усулидан қисман фойдаланганини тан олди. Бу ҳақда Ixbt.com хабар беради.
Бу ҳолат Маскнинг OpenAI компанияси, унинг бош директори Сэм Альтман ва Грег Брокманга қарши даъвоси бўйича суд жараёнида тасдиқланди. Маскнинг таъкидлашича, мавжуд илғор сунъий интеллектларга тизимли сўровлар юбориш орқали янги моделларни ўқитиш саноатда умумқабул қилинган амалиёт ҳисобланади.
Ҳозирда OpenAI, Anthropic ва Google каби йирик компаниялар учинчи томонлар томонидан уларнинг моделларидан шу мақсадда фойдаланишига қарши фаол курашмоқда. Асосий хавф шундаки, бошқа дастурчилар камроқ харажат эвазига бозор етакчиларига тенглашадиган нейротармоқларни яратиши мумкин.
Суд мажлисида Маск сунъий интеллект соҳасидаги етакчилар рейтингини ҳам эълон қилди. У биринчи ўринни Anthropic компаниясига берди, ундан кейин OpenAI, Google ва Хитойнинг очиқ кодли лойиҳалари жой олди.
Ўзининг 2023 йилда асос солинган xAI компаниясини эса у кичикроқ иштирокчи сифатида баҳолади.
OpenAI вакиллари Маскнинг иқрори юзасидан ҳозирча расмий изоҳ бермади. Етакчи лабораториялар эса ўз тизимларидан нусха кўчиришга қаратилган шубҳали оммавий сўровларни чеклаш механизмларини ишлаб чиқишни бошлади.
“Zamin”ни Telegram'да ўқинг!
