Россиянинг Санкт Петербург атрофида жойлашган Ленинград вилоятида содир бўлган жанжал ўлим билан якунланди. Ҳодиса юзасидан 31 ёшли Ўзбекистон фуқаросига нисбатан жиноий айблов эълон қилинди.
Маълумотларга кўра, воқеа 25 апрель куни кечқурун Свердлов қишлоғида рўй берган. Икки эркак ўртасида чиққан муштлашувдан сўнг улардан бири воқеа жойидан қочиб кетган, иккинчиси эса ерда ҳаракатсиз ҳолда қолган.
Ҳодиса жойига етиб келган шифокорлар жабрланувчининг вафот этганини тасдиқлаган. Кейинчалик унинг шахси аниқланиб, Тверь вилоятилик 45 ёшли фуқаро экани маълум бўлган. Унинг танасида, хусусан, бош қисмида жароҳатлар қайд этилган.
Тергов органлари мазкур ҳолатни эҳтиётсизлик оқибатида ўлимга олиб келган оғир тан жароҳати етказиш сифатида баҳолаган. Гумонланувчи кўп ўтмай ушбу ҳудуднинг ўзида қўлга олинган. У расмий иш жойига эга бўлмаган 31 ёшли Ўзбекистон фуқароси экани маълум қилинди.
Дастлабки маълумотларга кўра, икки шахс ўртасидаги можаро шахсий муносабатлар, аниқроғи, аёл масаласи ортидан келиб чиққан.
Ҳозирда ҳолат юзасидан тергов ҳаракатлари давом этмоқда.
