Сэм Альтман сунъий интеллект одамларни ишсиз қолдирмаслигини таъкидлади

OpenAI бош директори Сэм Альтман сунъий интеллект одамларнинг иш ўринларини эгаллаши ҳақидаги хавотирларни узоқ муддатли истиқболда ўта пессимистик деб атади. Унинг таъкидлашича, OpenAI компаниясининг мақсади одамларни тўлиқ алмаштирадиган эмас, балки уларнинг имкониятларини тўлдирадиган ва кенгайтирадиган воситаларни яратишдир. Бу ҳақда Ixbt.com хабар беради.

Альтман бу фикрларни турли соҳаларда, хусусан, АҚШда оммавий ишдан бўшатишлар хавотир уйғотаётган бир пайтда билдирди. Баъзи компаниялар иш ўринларининг қисқаришини сунъий интеллект жорий этилиши билан бевосита боғламоқда.

Масалан, Cандй Cруш Сага ўйинини яратган Кинг компанияси ўйин даражаларини ярата оладиган сунъий интеллект воситаларини ишлаб чиққанидан сўнг дастурчиларни ишдан бўшатгани хабар қилинган.

Anthropic бош директори Дарио Амодейнинг сунъий интеллект яқин 6-12 ой ичида деярли барча кодларни ёза олиши ҳақидаги тахмини хавотирларни янада кучайтирди. Бироқ, Альтман бу қарашга қўшилмайди.

Унинг фикрича, сунъий интеллект иш ўринларини ўзгартирса-да, одамларга бўлган эҳтиёжни йўқ қилмайди.

Альтман одамлар янада мазмунли ва юқори ҳақ тўланадиган ишларга ўтишига ишонади. Унинг сўзларига кўра, бандликнинг келажаги алмаштириш билан эмас, балки мослашиш билан белгиланади.

Альтман келажакда сунъий интеллект оғир меҳнатга бўлган эҳтиёжни камайтириб, одамларга янада мослашувчан ва тўлақонли ҳаёт кечириш имконини беришини тасаввур қилади.