Аты аңызға айналған MTV эфирден кетіп жатыр

Музыкалық телеарналар дәуірі тарих бетіне айналуда. Аңызға айналған MTV арнасы Еуропада өз қызметін тоқтататынын жариялады. Енді ол Ұлыбритания, Германия, Польша, Венгрия және басқа да бірқатар еуропалық елдерде эфирден кетеді. Бұл туралы жергілікті БАҚ хабарлады.

Мәліметтерге қарағанда, MTV желісіне кіретін бірнеше танымал арналар — MTV Music, MTV 80s, MTV 90s, Club MTV және MTV Live — 2025 жылдың 31 желтоқсанынан бастап хабар таратуды тоқтатады. Тек реалити-шоуларға маманданған MTV Reality арнасы ғана қалады.

Бұл шешім MTV үшін тарихи кезең болды. Себебі айқын: уақыт өзгерді, көрермен де өзгерді. Қазір адамдар музыкалық бейнелер мен концерттерді теледидар арқылы емес, YouTube, Spotify, TikTok және басқа да цифрлық платформалар арқылы көреді. Жас буын үшін смартфон экрандары дәстүрлі теледидарды алмастырды.

MTV алғаш рет 1981 жылы АҚШ-та эфирге шыққан және “Video Killed The Radio Star” әнімен жаңа музыкалық мәдениеттің басталуына түрткі болған. Ол ондаған жылдар бойы поп-мәдениет пен жастар стилінің басты символы болды. Бір кездері MTV Еуропа мен Ұлыбританиядағы ең танымал арналардың бірі еді.

Алайда интернеттің, әлеуметтік желілер мен бейнехостингтердің дамуы MTV-нің негізгі аудиториясын жоғалтты. Бұл телеарнаның қаржылық моделін де түбегейлі өзгертті. Қазір MTV реалити-шоулар мен онлайн контентке көбірек назар аударады.

MTV басшылығы телеарналардың жабылуы брендтің соңы емес, жаңа кезеңнің бастауы екенін атап өтті. Енді MTV заманауи форматта онлайн платформалар арқылы өз жұмысын жалғастырады.

Осылайша, “музыкалық телеарналар дәуірі” деп аталатын тұтас мәдени кезең аяқталуда. MTV — бүтін бір ұрпақтың жастық символы еді, енді бұл символ интернет сахнасына көшіп барады.

---