Тәжікстанның Исмоил Сомони жотасында орналасқан ірі мұздықтың бір бөлігі негізгі қабаттан ажырап түсті.
Мәліметтерге қарағанда, оқиға 25 қазан күні сағат 11:00 шамасында Тәжікобод ауданына қарасты Сафтаб ауылының маңында болған. Ажыраған мұздықтың ұзындығы шамамен 2 шақырым, биіктігі 25 метр, ені 150–200 метрді құраған.
Төтенше жағдайлар қызметінің ақпараты бойынша, мұздықтың жылжуы халыққа да, инфрақұрылымға да зиян келтірмеген. Оқиға зардапсыз аяқталған.
Мамандар бұл құбылысты климаттың өзгеруімен және ауа температурасының тұрақты жоғарылауымен байланыстыруда. Бұрын мұндай мұз көшкіні негізінен Үндістан мен Непалдағы Гималай тауларында байқалса, соңғы жылдары Орта Азияның таулы мұздықтарында да осындай жағдайлар жиі тіркелуде.
Гляциологтардың айтуынша, алдағы күндері қатты жауын-шашын болса, мұздықтың тағы бір бөлігі ажырап кетуі мүмкін. Мұндай жағдай Каса-и-Наби ауылы маңындағы Гүлрез қауымындағы кейбір шаруа қожалықтарына қауіп төндіруі ықтимал.
Болжам бойынша, егер мұздық толық еріп кетсе, шамамен 7–8 миллион текше метр су түзіледі. Алайда ғалымдар бұл процестің кенеттен су тасқынына әкелмейтінін атап өтуде.
“Zamin”-ді Telegram-нан оқыңыз!
