Солтүстік Кореяда Оңтүстік Корея сериалдарын көру немесе K-pop тыңдау жай ғана «көңіл көтеру» емес — ол үшін ауыр жазалар қолданылуы мүмкін. Куәгерлердің мәліметтеріне сүйенген Amnesty International дерегіне сәйкес, мұндай жағдайларда мектеп оқушыларын да еңбек лагерлеріне жіберу, көпшілік алдында қорлау, тіпті өлім жазасына дейін барған оқиғалар тіркелген.
Мәліметтерде «Күн ұрпақтары», «Кальмар ойыны» сияқты танымал драмаларды көру немесе K-pop әндерін тыңдау «қылмыс» ретінде бағалануы мүмкін екені айтылады. Ең ауыры — жаза көбіне ақша мен таныс-тамырға байланысты екені атап өтіледі: мүмкіндігі барлар пара арқылы жеңілірек құтылып кетсе, мүмкіндігі шектеулілер қатаңырақ салдарларға тап болады.
Amnesty International өкілі Сара Брукс бұл жағдайды «сыбайлас жемқорлықпен араласқан репрессия» деп атап, ақпаратқа қолжетімділікті шектеу және жазалау тәжірибесі ең алдымен ақшасы жоқ адамдардың өмірін бұзып жатқанын айтты.
Куәгерлердің айтуынша, соңғы жылдары Оңтүстік Кореяда шығарылған жаңа контент Солтүстік Кореяға бұрынғыдан жылдамырақ еніп, бұл да жағдайды ушықтырған. Кейбір қашқындар Янгган провинциясында «Кальмар ойыны»н көрген жоғары сынып оқушылары туралы ауыр мәліметтер келтірген.
Amnesty 2025 жылы Солтүстік Кореядан қашып шыққан 25 адаммен сұхбат жүргізгенін және қатысушылардың басым бөлігі 2019–2020 жылдары елден кеткенін атап өткен. COVID-19 салдарынан шекаралар жабылғаннан кейін қашу жағдайлары күрт азайғаны айтылады.
“Zamin”-ді Telegram-нан оқыңыз!
