Израильдің Иранға қарсы әскери операциясы жаңа кезеңге көшкені туралы хабарлар тарап жатыр. Reuters дереккөздеріне сенсек, операцияның екінші бөлігінде басты назар жер астында орналасқан баллистикалық зымыран қондырғыларын, бункерлерді және оларға байланысты инфрақұрылымды жоюға бағытталған. Бұл, ең алдымен, Иранның ұзақ мерзімді соққы беру мүмкіндіктерін бұзуға бағытталған қадам ретінде бағалануда.
5 наурызда САХАЛ да Тегеран маңындағы соққылар туралы мәлімдеме жасап, Иран тарапынан баллистикалық зымырандарды сақтауға және ұшақтарға қарсы қолдануға арналған зымыран қоймаларымен байланысты жер асты нысанына шабуыл жасалғанын хабарлады. Сондай-ақ зымыран кешенінің инфрақұрылымы да нысанаға алынғаны айтылады.
Хабарларға қарағанда, бірінші кезеңде негізгі соққылар құрлықтағы, яғни ашық немесе жартылай ашық орналасқан жүздеген зымыран құралдарына бағытталған. Reuters мәліметінше, бұл Израиль қалаларына шабуыл жасау үшін қолданылуы мүмкін жүйелер болған. Енді екінші кезеңде жер астында сақталатын баллистикалық зымырандарға, құрал-жабдықтарға және бекініс қоймаларына қысым күшейтілуде.
Бұл өзгеріс бекер емес. Дереккөздер талдауы бойынша, Израильдің мақсаты Иранның әскери әлеуетін біртіндеп әлсірету, әсіресе зымыран қуатын жүйелі түрде әлсірету болып табылады. Яғни, қазіргі шабуылдар тек бір реттік жауап емес, ұзақ есептелген стратегияның жалғасы ретінде қарастырылады.
Иранның зымыран қорына қатысты бағалар әртүрлі. Reuters және Economic Times келтірген сандарға сәйкес, Израиль әскері бұл арсеналды шамамен 2500 деп бағаласа, басқа сарапшылар бұл көрсеткішті 6000-ға дейін санайды. Осы айырмашылықтың өзі жанжалдың кейінгі дамуының қаншалықты күрт болатынын анықтай алады.
Қысқасы, жағдай оңай емес: бірінші толқында жер бетіндегі нысаналар жойылған болса, енді Иранның ең қорғалған жер асты зымыран нүктелеріне кезек келді. Демек, қақтығыс жалғасып қана қоймай, одан да терең және қауіпті кезеңге өтуде.
“Zamin”-ді Telegram-нан оқыңыз!
