Таяу Шығыстағы әскери қақтығыстар мен Ормуз бұғазының жабылып қалу қаупі әлемдік нарықта мұнай бағасының күрт қымбаттауына әкелді. 2022 жылдан бері алғаш рет мұнай бағасы 100 долларлық шектен асты. Deutsche Welle басылымының хабарлауынша, 9 наурызда Brent маркалы мұнай бағасы шамамен 20 пайызға өсіп, бір баррель үшін 111,04 долларды құрады. WTI маркалы мұнай 106,17 долларға дейін көтерілді. Салыстырмалы түрде айтсақ, жағдай ушыққанға дейін баға 70 доллар шамасында тұрақты болды.
Нарықтағы алаңдаушылықтың басты себебі – әлемдік мұнай жеткізілімінің 20 пайызы өтетін Ормуз бұғазының жабылу қаупі. Энергетикалық дағдарыстың алдын алу мақсатында АҚШ қаржы министрі Скотт Бессент Ресей мұнайына қатысты енгізілген санкцияларды ішінара жеңілдету мүмкіндігін қарастыруда. Атап айтқанда, Үндістанға Ресей мұнайын сатып алу үшін 30 күндік арнайы жеңілдік берілді.
Бұл жағдайдың ушығуына 7 наурызда Израильдің Иранның мұнай инфрақұрылымына жасаған әуе шабуылдары себеп болды. Тегеран маңындағы бес ірі энергетикалық нысан шабуылға ұшырағаннан кейін, Иран бұған жауап ретінде Парсы шығанағындағы басқа мемлекеттердің мұнай нысандарына да соққы берумен қорқытты. Бұл жаһандық отын нарығындағы тұрақсыздықты одан әрі күшейтіп, инвесторларды алаңдатуда.
“Zamin”-ді Telegram-нан оқыңыз!
