Қызылорда облысында ерекше жануар дүниеге келгені туралы ақпарат тарады, деп хабарлайды inbusiness.kz.
Желідегі ақпаратқа сәйкес, Қызылорда облысында сирек кездесетін аномалиясы бар жануар дүниеге келген. Видеода бір көзді, ішінде екі қарашығы бар лақ бейнеленген.
Куәгерлердің айтуынша, ерекше лақ өңірдегі жеке шаруашылықтардың бірінде туған. Белгілі болғандай, жаңа туған лақта өте сирек кездесетін туа біткен аномалия байқалған. Көз торлары бірігіп, біртұтас көзге айналған. Бұл құбылыс ғылымда "циклопия" деп аталады," - делінген таратылған бейресми ақпаратта.
Мамандардың айтуынша, циклопия эмбриондық дамудың алғашқы кезеңдерінде бет пен ми құрылымдарының толық ажыралмауынан туындайды. Бұл үдерісте көз шаралары бірігіп кетеді және нәтижеде әдеттегі екі көздің орнына бір орталық көз пайда болады.
Мұндай жағдайлар табиғатта өте сирек кездеседі және әдетте мұндай тіршілік иелерінің жасау мүмкіндігі едәуір төмен болады. Соған қарамастан, бұл құбылыс ғылыми тұрғыдан да, жұртшылық үшін де үлкен қызығушылық тудырып отыр.
Қызылорда облыстық ветеринария басқармасы "Сырдария аудандық ветеринариялық станциясы" шаруашылық жүргізу құқығындағы коммуналдық мемлекеттік кәсіпорны ақпаратты растады, бірақ жануар бірнеше сағаттан кейін өлгенін айтты.
