14:30 / 07.05.2026

«Кешірім сұрайды деп ойласаңыз, қатты қателесесіз». Юлдуз Усманова АҚШ-тағы еврейлерге қатысты пікір білдірді

Өзбекстан халық әртісі Юлдуз Усманова АҚШ-та өтетін концерті төңірегінде туындаған дауларға қатысты пікір білдірді. Әнші өзінің Instagram парақшасы арқылы видеоүндеу жолдап, ешқандай кешірім сұрамайтынын қатаң түрде мәлімдеді.

Белгілі болғандай, Юлдуз Усманова 2026 жылдың 9 мамырында Брайтон-Бич ауданында концерт өткізуді жоспарлаған болатын. Алайда соңғы күндері әлеуметтік желілерде АҚШ-тағы еврей қауымдастығы өкілдері тарапынан бұл концертті тоқтату туралы талаптар айтылуда. Бұған әншінің бірнеше жыл бұрын Израиль-Палестина қақтығысына қатысты білдірген көзқарастары себеп болған. Атап айтқанда, 2021 жылы ол бірнеше рет видеоүндеу жариялап, Палестина халқын қолдаған және сынға жауап берген еді.

Нью-Йорктегі кейбір америкалық саясаткерлердің де бұл мәселеде белсенділік танытып жатқаны айтылуда. Атап айтқанда, Брюс Блейкман, Майкл Новахов және Алек Брук-Красны бұл науқанды қолдап отыр. Бастамашылар әншіден көпшілік алдында айтқан сөздері үшін түсініктеме беруді және кешірім сұрауды талап етуде.

Әнші бұл шақыруларға жауап ретінде өз ұстанымын ашық білдірді:

«Егер мені кешірім сұрайды деп ойласаңыз, қатты қателесесіз. Егер еврейлер мэрия алдына жиналып, саяси процестерге араласып жатса, бұл біз үшін де белгілі бір дәрежеде пайдалы. Олар қарсы болса да, бұл маған абырой әкеледі», — деді ол.

Юлдуз Усманова өз көзқарасында нық екенін және кез келген зорлық-зомбылыққа қарсы екенін ерекше атап өтті:

«Мен өз пікірімде берікпін. Мен зорлық-зомбылықты қолдамаймын. Сонымен бірге, Палестина еркін болуы керек — бұл олардың жері. Мүмкін сіздер көне ұлт шығарсыздар, бірақ сіздер жаңа мемлекетсіздер, яғни Израильсіздер. Ал Америка — Израиль емес. Сондықтан өздеріңізді жоғары санамаңыздар», — деді әнші.

Сондай-ақ ол өз сөзінде бірқатар өткір пікірлер айтып, еврейлердің өз әрекеттері арқылы шынайы бет-бейнесін көрсетіп жатқанын алға тартты. Әнші өз ұлты мен дінін құрметтейтінін, өнер арқылы адамзатқа қызмет етуді мақсат ететінін білдірді.

«Біз өзін бағалайтын көне халықпыз және, әлхамдулиллях, мұсылманбыз. Өз дініміз бен отанымызды құрметтейміз. Қанша қарсы шықсаңыздар да, бұл маған танымалдылық әкеледі. Бүгін болмаса, ертең концерттерде міндетті түрде кездесеміз. Билеттер әрқашан сатылып кетеді. Өйткені маған берілген талантпен адамзат үшін ән саламын. Әділдік, иншааллах, орнайды», — деп сөзін түйіндеді ол.