Каталонияның әйгілі алыбы “Барселона” командасының шабуылшысы Ламин Ямал UEFA Чемпиондар лигасының ширек финалы аясында “Атлетикоға” қарсы өтетін жауап матч алдындағы ойларымен бөлісті. Алғашқы кездесуде 0:2 есебімен жеңілген “көк-қызылдар” Мадридте өте ауыр сынақпен бетпе-бет келіп отыр.
Жас болса да, қазірдің өзінде үлкен қысымды сезініп жүрген Ямал осы маңызды ойын алдында психологиялық дайындыққа ерекше көңіл бөлуде. Ол әлеуметтік желідегі аватарын LeBron James-тің NBA кубогымен түскен суретіне ауыстыруы кездейсоқ емес екенін айтты.
Футболшы мұны мотивация ретінде қолданатынын жасырмады:
— Леброн — алдағы ойынға маған шабыт бере алатын адамдардың бірі, сондықтан мен оны таңдадым. Оның NBA-да командасымен бірге 1:3 есебінен 4:3-ке айналдырған сериясын ойлаймын. Бұл — нағыз ерік-жігердің үлгісі. Менде де дәл сондай жағдай болады деп үміттенемін, — деді Ямал.
Фото: Getty Images
Оның пікірінше, қазіргі “Барселона” құрамында ойынның бағытын өзгерте алатын жеткілікті ойыншылар бар. Ямал өзін команданың жалғыз көшбасшысы деп санамайтынын, керісінше барлық ойыншылар бірге нәтиже үшін күресу керектігін атап өтті.
Жауапкершілік туралы айтқан жас вингер былай деді:
— “Барселона” сияқты клубта ойнағаныма қуаныштымын. Мұнда жоғары деңгейлі, үлкен тәжірибесі бар және әр маусым сайын өз деңгейін дәлелдеп жүрген әлемдік деңгейдегі футболшылар бар. Сондықтан ойын тек маған байланысты деп ойламаймын. Бірақ солай болса да, мен бұған қарсы емеспін. Біздің командада өздерін көрсете алатын көптеген ойыншылар бар, сондықтан мен командаға сенемін.
Шын мәнінде, “Барселона” үшін алдағы матч — маусым тағдырын шешуі мүмкін ең маңызды ойындардың бірі. Қайта оралу оңай болмайды, бірақ футболда мүмкін емес нәрсе жоқ.
Ақпарат үшін, жауап кездесуі 14 сәуір күні Мадридтегі “Метрополитано” стадионында өтеді. Енді барлық назар осы ойынға аударылған — “Барса” керемет жасай ала ма, әлде “Атлетико” басымдығын сақтап қала ма?
