UEFA Чемпиондар лигасының жартылай финалдық кезеңі аясында «Атлетико» және «Арсенал» командалары арасындағы алғашқы кездесу аяқталды. Мадридте өткен бәсекеде командалар 1:1 есебімен тең түсті.
Ойынның 44-минутында «Арсенал» шабуылшысы Виктор Дьёкереш пенальтиді дәл орындап, есеп ашты. Екінші таймның 56-минутында айдын иелерінің өкілі Хулиан Альварес 11 метрлік айып соққысын сәтті пайдаланып, таразы басын теңестірді.
Статистикалық мәліметтерге сәйкес, «Атлетико» қақпаға 14 соққы бағыттады, оның 5-еуі дәл шықты. Лондондықтар болса 8 соққымен жауап қайтарды.
Допқа иелік ету бойынша алаң иелері 51 пайыздық көрсеткішпен азғантай басымдыққа ие болды.
Кездесу барысында «Атлетико» футболшылары 495 пас берсе, «Арсенал» мүшелері 479 пасты жүзеге асырды. Қонақтар пастардың дәлдігі бойынша 89 пайыздық нәтижемен қарсыластарынан озып кетті.
Енді командалар қарымта ойында финал жолдамасы үшін күресті жалғастырады.
“Zamin”-ді Telegram-нан оқыңыз!
