Chexiya prezidenti Petr Pavel G‘arbni muvaffaqiyatsizlikka yo‘l qo‘ymaslik uchun Ukrainaga o‘z hududi ustidan nazoratni tiklashi uchun zarur bo‘lgan hamma narsani berishga chaqirdi. Bu haqda u 27 noyabr kuni e’lon qilingan Italiyaning Sorriere della Sera gazetasiga bergan intervyusida ma’lum qildi.
«Bizda Ukrainaga suverenitet va chegaralarni nazorat qilish missiyasini bajarishda muvaffaqiyat qozonishi uchun zarur bo‘lgan hamma narsani berishdan boshqa ilojimiz yo‘q: bundan kami bizning muvaffaqiyatsizligimiz bo‘ladi», dedi Pavel. Uning fikricha, Rossiyaning g‘alabasi Yevropa uchun kelajakda «noxush oqibatlarga» olib keladi. «Bu ularning o‘z maqsadlariga kuch bilan erishishi mumkinligi haqidagi tasavvurlarini kuchaytiradi va dunyodagi barcha rejimlarni G‘arb demokratiyalari zaifligiga tayanishga undaydi», — dedi Pavel.
Chexiya prezidenti va NATO sobiq generalining so‘zlariga ko‘ra, Rossiya allaqachon o‘z sanoatini harbiy rejimga o‘tkazishga muvaffaq bo‘lgan, ancha katta kalibrli o‘q-dorilar va tanklar ishlab chiqarmoqda, ko‘proq askarlarni jalb qilmoqda, shuningdek, bir qator davlatlar bilan qurol-yarog‘ yetkazib berish bo‘yicha muzokaralar olib bormoqda. «Agar biz Ukrainani qo‘llab-quvvatlash imkoniyatini qo‘ldan boy bersak, kelasi yil Moskva uchun yanada qulayroq bo‘lishi mumkin. Bu yil muvaffaqiyat poydevorini qo‘yish uchun hal qiluvchi ahamiyatga ega, kelasi yil yanada qiyin bo‘ladi», - dedi Pavel.
Pavel: biz qurol yetkazib berish haqidagi va’damizni bajarmadik
G‘arb hamkorlaridan Kiyevga harbiy texnika yetkazib berish hajmi Ukrainaning yuqori intensiv operatsiyani davom ettirishi uchun yetarli emas, dedi Pavel. «Biz ukrainaliklarni artilleriya o‘q-dorilari bilan ta’minlash bo‘yicha va’damizni bajarmadik, F-16 mashg‘ulotlari kerakli darajada tez amalga oshirilmayapti», dedi Chexiya prezidenti.
Uning so‘zlariga ko‘ra, Buyuk Britaniyadan uzoq masofaga uchishga mo‘ljallangan Storm Shadows raketalari va Fransiyadan shunga o‘xshash raketalarni olganidan so‘ng, Ukraina Germaniyaning Taurus'ini olishini kutgandi, biroq Germaniya rasmiylari hali bunday qarorga kelmagan.
«Bu yetkazib berishda nomutanosiblikni keltirib chiqaradi, Ukraina tomonidagi noaniqlik esa harbiy rejalashtirish uchun yaxshi asos emas», deb tushuntirdi Pavel. Uning so‘zlariga ko‘ra, Ukrainada joriy qish «o‘ta og‘ir» bo‘ladi, chunki mamlakat o‘tgan qishda vayron qilingan infratuzilmani to‘liq tiklay olmadi. «Bu aholi uchun qiyin bo‘ladi va hozirda Ukrainani qo‘llab-quvvatlayotgan mamlakatlarning qat’iyatsizligini hisobga olsak, umidsizlik hissi kuchayadi», deb hisoblaydi Pavel.
“Zamin” yangiliklarini “Telegram”da kuzatib boring
