Migratsiya agentligi ma’lumotiga ko‘ra, mamlakatda xususiy bandlik agentliklari faoliyati endilikda yanada qat’iy moliyaviy kafolatlar asosida amalga oshiriladi. Bu talablar fuqarolar xavfsizligi, ularning huquq va manfaatlarini muhofaza qilish hamda bandlik tizimidagi shaffoflikni yanada kuchaytirishni ko‘zlaydi.
Ish boshlashdan avval – katta miqdordagi zahira talab etiladi
Yangilangan talabga ko‘ra, har bir xususiy bandlik agentligi faoliyatini yo‘lga qo‘yishdan oldin to‘lov qobiliyati va mas’uliyatini tasdiqlovchi moliyaviy kafolat sifatida BHMning 4 000 barobariga teng mablag‘ni tijorat bankidagi maxsus depozit hisobvaraqqa joylashtirishi shart.
Bu mablag‘ agentlikning o‘zboshimchalik qilishi yoki qonunbuzarlikka yo‘l qo‘yishi holatlarida fuqarolarni moddiy jabrdan himoya qilishga qaratilgan.
Depozit mablag‘i – qat’iy nazorat ostida
Migratsiya agentligining ta’kidlashicha, depozitdagi mablag‘ni agentlik roziligisiz sarflash mutlaqo mumkin emas. Agar mablag‘ ruxsatsiz ishlatilsa, belgilangan muddatda uni to‘liq qayta tiklash majburiyati yuzaga keladi.
Mablag‘ bank, Migratsiya agentligi va xususiy bandlik agentligi o‘rtasida imzolanadigan maxsus shartnoma asosida saqlanadi. Bu esa har bir tomonning huquq va majburiyatlarini aniq belgilab beradi.
Qonun buzilsa – kompensatsiya avtomat tarzda amalga oshiriladi
Agar xususiy bandlik agentligi fuqarolar manfaatlariga zarar yetkazsa yoki qonun talablarini buzsa, Migratsiya agentligi bankka asoslangan talabnoma taqdim etadi. Bank esa depozitdan talab qilingan summani yechib, Migratsiya jamg‘armasiga o‘tkazadi. Bu mexanizm fuqarolarni o‘z vaqtida va kafolatli tarzda himoya qilishni ta’minlaydi.
Yangi tartibning asosiy maqsadi
Mazkur tartib xususiy bandlik agentliklari faoliyatini mas’uliyatli, qonuniy va shaffof qilish, xorijda ishlashni xohlagan fuqarolarni firibgarlikdan himoyalash hamda sohadagi nazoratni kuchaytirishni ko‘zlaydi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
