Jahon reytingida Oʻzbekiston bandlik darajasi oʻrni ochiqlandi
Jahon miqyosida e'lon qilingan yangi reytingda O'zbekiston 187 davlat orasida bandlik darajasi bo'yicha 114-o'rinni egalladi. Mamlakatda bandlik darajasi 55 foizni tashkil etib, bu ko'rsatkichga ta'lim olayotgan yoshlar, uy bekalari va norasmiy sektordagi ishchilar soni ta'sir qilgan. Mutaxassislarning fikricha, iqtisodiy o'sish uchun bandlikni oshirish, yangi ish o'rinlari yaratish va kichik biznesni qo'llab-quvvatlash muhim vazifalardir.
Jahon miqyosida aholining bandlik darajasi boʻyicha yangi reyting eʼlon qilindi. Oʻzbekiston ushbu roʻyxatda 187 ta davlat orasida 114-oʻrindan joy oldi. Mazkur maʼlumotlar Xalqaro mehnat tashkilotining 2025 yilgi tahliliy hisobotida keltirilgan.
Tadqiqot natijalariga koʻra, Oʻzbekistonda bandlik darajasi 55 foizni tashkil etadi. Bu esa mehnatga layoqatli aholining yarmidan biroz koʻprogʻi iqtisodiy faoliyatga jalb etilganini anglatadi. Mazkur koʻrsatkich mehnat bozorining umumiy holatini aks ettiruvchi muhim mezonlardan biri hisoblanadi.
Mutaxassislar qayd etishicha, ushbu natija bir nechta omillar bilan izohlanadi. Xususan, oliy va oʻrta taʼlimda tahsil olayotgan yoshlar ulushi, uy bekalari sonining yuqoriligi, shuningdek, norasmiy sektorda faoliyat yuritayotgan fuqarolar hissasi umumiy koʻrsatkichga taʼsir qilmoqda. Yaʼni, rasmiy statistikada aks etmayotgan bandlik ham muhim rol oʻynaydi.
MDH davlatlari kesimida:
- Qozogʻiston — 67 foiz, 29-oʻrin;
- Belarus — 61 foiz, 67-oʻrin;
- Rossiya — 60 foiz, 73-oʻrin;
- Qirgʻiziston — 111-oʻrin;
- Tojikiston — 175-oʻrindan joy olgan.
Tahlilchilarning fikricha, Oʻzbekiston uchun bandlik darajasini oshirish iqtisodiy oʻsishning muhim omillaridan biri boʻlib qolmoqda. Bu borada yangi ish oʻrinlarini yaratish, kichik biznesni qoʻllab-quvvatlash hamda norasmiy bandlikni qisqartirish ustuvor vazifalar sifatida koʻrilmoqda.
Izohlar 0
…