Mamlakatimizda tadbirkorlikka keng yo‘l ochish va yer resurslaridan oqilona foydalanish borasidagi islohotlar yangi bosqichga ko‘tarilmoqda. Prezidentimiz raisligida o‘tgan yig‘ilishda sohadagi sustkashliklar tanqid qilinib, byurokratik to‘siqlarni parchalab tashlaydigan inqilobiy o‘zgarishlar белгиланди. Zamin.uz ushbu muhim islohotlarning eng asosiy jihatlarini taqdim etadi.
«Bosh reja yo‘q» degan bahonalarga chek qo‘yiladi
Tahlillarga ko‘ra, 2025 yilda yerni xususiylashtirish istagida bo‘lgan fuqarolarning 112 mingta arizasidan 14 foizi aynan bosh reja mavjud emasligi vajidan rad etilgan. Buning oqibatida davlat byudjeti 550 milliard so‘mlik tushumdan mahrum bo‘ldi, 4 ming gektar yer esa iqtisodiy aktivga aylanmay qoldi.
Endilikda bu tizim tubdan o‘zgaradi: uch oy muddatda arizalarga inson omilisiz, atigi 5-10 daqiqa ichida onlayn javob qaytaradigan shaffof tizim ishga tushiriladi.
Qog‘ozdagi reja emas, amaliy dastur kerak
Yig‘ilishda bosh rejalarning sifati keskin tanqid qilindi. Reja bor, lekin unda kommunikatsiya tarmoqlari — suv, gaz, elektr va yo‘llar qachon va qaysi mablag‘ hisobidan qurilishi nomaʼlumligicha qolmoqda. Buning oqibatida infratuzilmaga kerak bo‘lganidan 2-3 barobar ko‘p mablag‘ sarflanmoqda.
- Har bir viloyat hokimiga ikki oy ichida bosh rejalarni hayotga tatbiq etish bo‘yicha kompleks dasturlar ishlab chiqish vazifasi yuklatildi.
- Dasturlarda qaysi loyiha byudjetdan, qaysi biri xalqaro tashkilotlar mablag‘i hisobidan moliyalashtirilishi aniq ko‘rsatiladi.
Tadbirkor uchun qulaylik: To‘siqlar olib tashlanadi
Bugungi kunda biznes uchun yiliga 6,5 ming gektar yer va 140 trillion so‘mlik ulkan resurslar ajratilmoqda. Biroq, yer va kredit masalasi hal bo‘lgan tadbirkorlar qurilishni boshlashda hamon korrupsiya va sansalorlikka duch kelayotgani aytib o‘tildi.
So‘nggi to‘rt yilda auksionda sotilgan yerlarning 3 ming gektarida haligacha qurilish boshlanmagan. Bu esa boy berilgan 100 ming ish o‘rni va iqtisodiyot uchun 25 trillion so‘mlik yo‘qotish demakdir.
Xususiylashtirishda yangi yengilliklar
Endilikda xususiylashtirish dasturiga obyektlarni kiritish va sotish samaradorligi uchun hokimlar Davlat aktivlari agentligi bilan tengma-teng javobgar bo‘ladi. Eng quvonchli yangiliklardan biri — xususiylashtirilgan obyektlar uchun to‘lovni bo‘lib-bo‘lib to‘lashda hisoblanadigan 14 foizlik yillik ustama bekor qilindi.
Bundan tashqari, qurilishda zamonaviy texnologiyalar, seysmologiya va zilzilabardoshlik talablariga rioya qilish bo‘yicha yangi yechimlar joriy etilishi soha rahbarlari oldiga qatʼiy vazifa qilib qo‘yildi.
Aziz mushtariylar, sizningcha, yer xususiylashtirish tizimining to‘liq raqamlashtirilishi korrupsiyaga chek qo‘ya oladimi? Qurilish sohasidagi byurokratiyaning kamayishi uy-joy narxlariga qanday taʼsir qiladi?
“Zamin”ni Telegramʻda oʻqing!
