O'zbekistonda joriy yilda kartoshkaga bo'lgan ichki talabni to'liq qoplash maqsadida 180 ming gektar yer ajratish rejalashtirilgan edi. Hozirgi kunga qadar ushbu maydonlarning 118 ming gektariga urug'lik ekish ishlari yakunlandi. Biroq ayrim hududlarda bu boradagi ko'rsatkichlar kutilganidan ancha past bo'lib qolmoqda.
Xususan, Qashqadaryo viloyatida rejalashtirilgan maydonlarning bor-yo'g'i 41 foiziga, Surxondaryo viloyatida esa 44 foiziga kartoshka ekilgan. Ekish ishlarining kechikishi bozorlardagi narx-navoga ham salbiy ta'sir ko'rsatdi. Mart oyining o'zida kartoshka narxi Surxondaryoda 12,4 foizga, Qashqadaryoda esa 9 foizga ko'tarilgani qayd etildi.
Kartoshkachilikka ixtisoslashgan Xo'jaobod, Andijon, Kosonsoy, Chortoq, Chust, Yangiqo'rg'on, Toshloq va Farg'ona tumanlarida ham ishlar qoniqarsiz deb topildi. Sustkashlikka yo'l qo'ygan viloyat hokimlarining qishloq xo'jaligi bo'yicha o'rinbosarlari hamda tuman hokimlarining mas'uliyatini oshirish bo'yicha topshiriqlar berildi.
Prezident Shavkat Mirziyoyev oziq-ovqat xavfsizligi masalasiga to'xtalib, barcha resurslar mavjudligini ta'kidladi. «Takror aytaman: mablag' bor, resurs bor. Go'sht va kartoshkadan hech qanday masala bo'lmasligi kerak», — deya qayd etdi davlat rahbari.
“Zamin”ni Telegramʻda oʻqing!
