Миграция агентлиги маълумотига кўра, мамлакатда хусусий бандлик агентликлари фаолияти эндиликда янада қатъий молиявий кафолатлар асосида амалга оширилади. Бу талаблар фуқаролар хавфсизлиги, уларнинг ҳуқуқ ва манфаатларини муҳофаза қилиш ҳамда бандлик тизимидаги шаффофликни янада кучайтиришни кўзлайди.
Иш бошлашдан аввал – катта миқдордаги заҳира талаб этилади
Янгиланган талабга кўра, ҳар бир хусусий бандлик агентлиги фаолиятини йўлга қўйишдан олдин тўлов қобилияти ва масъулиятини тасдиқловчи молиявий кафолат сифатида БҲМнинг 4 000 баробарига тенг маблағни тижорат банкидаги махсус депозит ҳисобвараққа жойлаштириши шарт.
Бу маблағ агентликнинг ўзбошимчалик қилиши ёки қонунбузарликка йўл қўйиши ҳолатларида фуқароларни моддий жабрдан ҳимоя қилишга қаратилган.
Депозит маблағи – қатъий назорат остида
Миграция агентлигининг таъкидлашича, депозитдаги маблағни агентлик розилигисиз сарфлаш мутлақо мумкин эмас. Агар маблағ рухсатсиз ишлатилса, белгиланган муддатда уни тўлиқ қайта тиклаш мажбурияти юзага келади.
Маблағ банк, Миграция агентлиги ва хусусий бандлик агентлиги ўртасида имзоланадиган махсус шартнома асосида сақланади. Бу эса ҳар бир томоннинг ҳуқуқ ва мажбуриятларини аниқ белгилаб беради.
Қонун бузилса – компенсация автомат тарзда амалга оширилади
Агар хусусий бандлик агентлиги фуқаролар манфаатларига зарар етказса ёки қонун талабларини бузса, Миграция агентлиги банкка асосланган талабнома тақдим этади. Банк эса депозитдан талаб қилинган суммани ечиб, Миграция жамғармасига ўтказади. Бу механизм фуқароларни ўз вақтида ва кафолатли тарзда ҳимоя қилишни таъминлайди.
Янги тартибнинг асосий мақсади
Мазкур тартиб хусусий бандлик агентликлари фаолиятини масъулиятли, қонуний ва шаффоф қилиш, хорижда ишлашни хоҳлаган фуқароларни фирибгарликдан ҳимоялаш ҳамда соҳадаги назоратни кучайтиришни кўзлайди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
