O‘zbekistonda 2030 yilgacha mo‘ljallangan ma’naviy-ma’rifiy va madaniy rivojlanish bo‘yicha strategik reja ishlab chiqildi. Hujjat milliy qadriyatlarni mustahkamlash, jamiyatni g‘oyaviy tahdidlardan himoya qilish hamda madaniyat infratuzilmasini yangilashga qaratilgan. Bu haqda podrobno.uz xabar beradi.
Strategiyada kitobxonlikni kengaytirish alohida yo‘nalish sifatida belgilangan. Rejaga ko‘ra, faol kitob o‘qiydigan yoshlar soni 5 millionga yetkaziladi, buning uchun kutubxona fondidagi 40 million kitob raqamlashtiriladi. Shuningdek, “O‘zbek adabiyoti xazinalari” va “Jahon bolalar adabiyoti durdonalari” kabi ko‘p jildli turkumlarni nashr etish yo‘lga qo‘yilishi ko‘zda tutilgan.
Mamlakat ijodiy salohiyatini kuchaytirish doirasida har yili kamida 100 ta muhim badiiy asar va bolalar uchun 50 ta badiiy kitob yaratish rejalashtirilmoqda. Bu jarayonlarda ilmiy hamda sotsiologik tadqiqotlar tayanch bo‘lib, ijtimoiy-ma’naviy muhitdagi o‘zgarishlarni kuzatish va milliy qadriyatlarni tizimli qo‘llab-quvvatlashga xizmat qiladi.
Jamiyatning ijtimoiy-ma’naviy barqarorligini ta’minlashda oila, maktab va davlat hamkorligi asosiy tamoyil sifatida qayd etilgan. Ta’lim muassasalarini zamonaviy madaniyat markazlariga aylantirish, tarbiyada interaktiv yondashuvlarni joriy etish va yoshlarni tashqi g‘oyaviy ta’sirlardan himoyalash mexanizmlarini kuchaytirish rejalashtirilmoqda.
Infratuzilma yo‘nalishida teatr sohasi katta modernizatsiyadan o‘tadi: 2030 yilgacha 40 ta amaldagi teatr rekonstruksiya qilinadi, 6 ta yangi bino quriladi, jumladan, ikki yangi qo‘g‘irchoq teatri ham barpo etiladi. Moddiy-texnik bazani yangilash va yuqori saviyadagi sahna asarlarini yaratish hisobiga teatr tomoshabinlari sonini yiliga 5 millionga yetkazish, o‘zbek sahna va sirk san’atini xalqaro maydonda yangi bosqichga olib chiqish maqsad qilingan.
“Zamin”ni Telegramʻda oʻqing!
