Global Firepower’ning yangilangan harbiy qudrat indeksida O‘zbekiston Qurolli kuchlari o‘z o‘rnini sezilarli yaxshiladi. 145 ta davlat qamrab olingan ro‘yxatda mamlakat 53-pog‘onaga ko‘tarilib, Markaziy Osiyo bo‘yicha eng yuqori natijani qayd etdi. Bu haqda podrobno.uz xabar beradi.
2026 yilgi reytingga ko‘ra, O‘zbekiston o‘tgan yilga nisbatan besh pog‘ona yuqorilagan va 58-o‘rinda turgan Qozog‘istonni ortda qoldirgan.
Mamlakatning asosiy ustunliklaridan biri — safarbarlik salohiyati. 36,5 million aholining qariyb 16 millioni harbiy xizmatga yaroqli deb baholanadi. Armiya safida taxminan 120 ming harbiy xizmatchi bor, ularning katta qismi quruqlik bo‘linmalarida xizmat qiladi.
Texnik ta’minot ko‘rsatkichlari ham yuqori: O‘zbekiston ixtiyorida 470 ta tank va 8 692 ta zirhli texnika mavjud. Artilleriya yo‘nalishida, jumladan, 177 ta o‘ziyurar artilleriya qurilmasi qayd etilgan bo‘lib, bu ko‘rsatkich bo‘yicha mamlakat dunyoda 23-o‘rinni egallagan.
Havo kuchlari tarkibida 159 ta uchish texnikasi bor, shundan 101 tasi vertolyotlar. Zarba beruvchi aviatsiyaga alohida e’tibor qaratilgani ta’kidlanadi: 34 ta zarba vertolyoti ushbu mezon bo‘yicha O‘zbekistonga global reytingda 20-o‘rinni ta’minlagan.
Umumiy natijalarga ko‘ra, O‘zbekiston Markaziy Osiyoda harbiy salohiyat bo‘yicha yetakchi sifatida mustahkam o‘rnashdi. Mintaqadagi tartib: O‘zbekiston — 53-o‘rin, Qozog‘iston — 58-o‘rin, Turkmaniston — 78-o‘rin, Tojikiston — 100-o‘rin, Qirg‘iziston — 109-o‘rin.
“Zamin”ni Telegramʻda oʻqing!
