Namangan viloyatida insonparvarlik va jasorat namunasiga aylangan voqea yuz berdi. Favqulodda vaziyatlar xizmati xodimi oqimda oqib ketayotgan kichik yoshli bolani qutqarib qoldi.
Maʼlum qilinishicha, 26 aprel kuni Yangi Namangan tumanidagi “Mingterak” mahallasi hududidan oʻtuvchi Katta Namangan kanalida 3 yoshli bola suvga tushib, oqim boʻylab ketgan.
Aynan shu vaqtda Davlatobod tumani FVV boʻlimi xodimi Ulugʻbek Asqarov xizmatdan qaytib ketayotgan edi. U tasodifan bolaning xavfli holatda ekanini payqab qolib, bir zumda harakatga oʻtgan.
Qutqaruvchi hech ikkilanmasdan suvga sakrab tushib, choʻkib ketayotgan bolani olib chiqqan va uning hayotini saqlab qolgan. Taʼkidlanishicha, bolaga zudlik bilan yordam koʻrsatilgan va hozirda uning ahvoli yaxshi.
Ushbu qutqaruv jarayoni mahalliy aholining uyiga oʻrnatilgan kuzatuv kamerasi orqali ham tasvirga tushib qolgan.
Mazkur holat qutqaruvchilarning har qanday vaziyatda tayyor va fidoyi ekanini yana bir bor isbotladi.
