Madridning «Real» klubi hujumchisi Kilian Mbappening jarohati rasman tasdiqlandi. Klub tibbiy shtabi oʻtkazgan tekshiruvlar natijasiga koʻra, fransiyalik yulduz chap oyoq orqa son qismidagi yarim payli mushakni shikastlagani maʼlum boʻldi.
Eslatib oʻtish joiz, Mbappe oʻtgan juma kuni La Liga doirasidagi «Betis»ga qarshi bahsda (1:1) noqulay holatga tushib, 80-daqiqada maydonni tark etishga majbur boʻlgandi. Ilk maʼlumotlarda bu holat mushak charchogʻi sifatida baholangan boʻlsa, keyingi tekshiruvlar jarohat jiddiyroq ekanini koʻrsatdi.
Ispaniya matbuoti, jumladan Marca nashrining yozishicha, 27 yoshli hujumchi yakshanba kuni boʻlib oʻtadigan «Espanol»ga qarshi oʻyinni aniq oʻtkazib yuboradi. Ammo asosiy eʼtibor — 10 may kuni boʻladigan «Barselona»ga qarshi prinsipial toʻqnashuvga qaratilgan.
Maʼlum qilinishicha, Mbappe shifokorlar va reabilitatsiya mutaxassislari bilan birgalikda tiklanish jarayonini tezlashtirishga harakat qilmoqda. U “El Klasiko”ga ulgurish uchun barcha imkoniyatlarni ishga solishi kutilmoqda.
Qisqacha aytganda, vaqt kam — lekin motivatsiya maksimal. Agar ulgursa, bu oʻyin yanada qiziydi.
“Zamin”ni Telegramʻda oʻqing!
