Navoiy viloyatidagi Qizilko'k konida uran qazib olishning sanoat bosqichi boshlandi. Loyiha operatori hisoblangan "Navoiyuran" kompaniyasi yer ostida tanlab eritish usuli yordamida tijoriy foydalanish yo'lga qo'yilganini ma'lum qildi. Mazkur konning zaxiralari 9 400 tonnaga baholanmoqda, umumiy resurslar esa 10 900 tonnani tashkil etadi. Bu haqda Inbusiness.kz xabar beradi.
Kompaniya bosh direktori Jamol Fayzullayevning so'zlariga ko'ra, konni tajriba-sanoat asosida ishlatish 2024 yil dekabr oyida boshlangan edi. Ikki yillik faol faoliyatdan so'ng loyiha tijoriy bosqichga chiqdi. Bu qadam O'zbekistonning 2030-yilgacha uran qazib olish va qayta ishlash hajmini oshirish bo'yicha davlat dasturi doirasida amalga oshirilmoqda.
Qizilko'k koni 15 yil davomida ekspluatatsiya qilinishi rejalashtirilgan bo'lib, uning yillik quvvati 1,2 ming tonnagacha yetadi. Qizilqum cho'lining sharqiy qismida joylashgan ushbu ob'ekt Amantov, Qizilko'k va Janubiy litsenziya bloklarini o'z ichiga oladi. Ishlab chiqarishda reagentlarni kam sarflaydigan kislorodli usul qo'llanilmoqda, bu esa mahsulot tannarxini 2-3 baravar kamaytirish imkonini beradi.
Ma'lumot uchun, 2024-yilda O'zbekiston qariyb 4 000 tonna uran qazib olib, dunyoda beshinchi o'rinni egalladi. "Navoiyuran" hozirda 43 ta konni boshqarmoqda va jahon bozoridagi oltinchi yirik ishlab chiqaruvchi hisoblanadi. Kompaniyaning umumiy resurs bazasi 151 100 tonnani tashkil etadi.
[media=https://insports.kz/embed/inbusiness?channel=atamekenbusiness&limit=10&lang=ru] “Zamin”ni Telegramʻda oʻqing!
