Oʻzbekiston va Turkiya taʼlim hamda stipendiya hamkorligini kengaytirish masalalarini muhokama qildi
21 yanvar kuni Anqarada Oʻzbekiston tashqi ishlar vaziri maslahatchisi Munira Aminova Turkiyaning Chet eldagi turklar va qardosh jamoalar ishlari boshqarmasi (YTB) rahbari Abdulhadi Turus bilan uchrashdi. Bu haqda uzdaily.uz xabar beradi.
Muzokaralarda tomonlar ikki mamlakat oʻrtasidagi taʼlim va madaniy almashinuvni rivojlantirishga qaratilgan amaldagi hamkorlik holati hamda istiqboldagi tashabbuslarni atroflicha ko‘rib chiqdi. Suhbat markazida YTB stipendiya dasturlarining natijalari ham bo‘ldi: 2025 yilda ushbu dasturlarga Oʻzbekistonning 228 nafar fuqarosi qabul qilingan, hozirda 136 nafar talaba taʼlimni davom ettirmoqda.
Umuman olganda, YTB dasturlari orqali 3 200 nafardan ortiq ishtirokchi o‘qishni muvaffaqiyatli yakunlagani, bitiruvchilar bilan aloqani mustahkamlash uchun alohida portal ishga tushirilgani qayd etildi.
Uchrashuvda “Kultural Turk” ensiklopediyasi, Zangturon tashabbusi, zargarlik yo‘nalishi va shoshilinch tibbiy yordam bo‘yicha o‘quv dasturlari kabi amaldagi loyihalar muhokama qilindi.
Shuningdek, axborot texnologiyalari va kiberxavfsizlik bo‘yicha yangi dasturlar, yosh diplomatlar uchun ixtisoslashgan treninglar hamda farmatsevtika sanoatini rivojlantirishga qaratilgan loyihalar yuzasidan fikr almashildi.
Yakunda tomonlar taʼlim va malaka oshirish yo‘nalishlarida hamkorlikni yanada kuchaytirishga tayyor ekanini tasdiqlab, yuqori malakali kadrlar tayyorlash va professional almashinuvlarni kengaytirishda qo‘shma saʼy-harakatlar muhimligini taʼkidladi.
“Zamin”ni Telegramʻda oʻqing!
