Bugun, 27 aprel kuni O‘zbekiston Respublikasining Birinchi xonimi, “Zamin” jamoat fondi Vasiylik kengashi raisi Ziroat Mirziyoyeva Xorazm viloyatiga amaliy tashrif bilan bordi. Bu haqda u o‘zining rasmiy Telegram-sahifasi orqali ma’lum qildi.
Ma’lum qilinishicha, tashrif doirasida Birinchi xonim avvalo Urganch shahrida joylashgan, eshitishida nuqsoni bo‘lgan bolalar uchun mo‘ljallangan 96-son ixtisoslashtirilgan maktab-internatga tashrif buyurdi. U yerdagi o‘quv novvoyxonasi faoliyati bilan tanishgan Ziroat Mirziyoyeva tarbiyalanuvchilar bilan samimiy suhbatlashdi va ular bilan birgalikda non yopish jarayonida ishtirok etdi. Bu esa bolalar uchun unutilmas va ruhlantiruvchi lahzalardan biri bo‘ldi.
Shundan so‘ng Birinchi xonim Ijtimoiy himoya milliy agentligi huzuridagi Bolalar ijodkorligi va iste’dodlarini rivojlantirishga ixtisoslashgan inklyuziv markazga tashrif buyurdi. U yerda tarbiyalanayotgan bolalar bilan muloqot qilar ekan, ularning qiziqishlari, orzu-maqsadlari bilan yaqindan tanishdi. Suhbat davomida o‘quvchilardan biri o‘z qo‘li bilan yasagan taqinchoqni Ziroat Mirziyoyevaga sovg‘a qildi. Bu esa samimiy muhitni yanada iliqlashtirdi.
Tashrifning yana bir muhim qismi ekologik yo‘nalishda bo‘ldi. Birinchi xonim ekologiya faollari bilan birgalikda Xiva shahridagi “Arda Xiva” turizm majmuasida o‘tkazilgan keng ko‘lamli ko‘chat ekish aksiyasida ishtirok etdi. Ushbu tadbir doirasida 3 mingdan ortiq daraxt va turli xil o‘simliklar yerga qadab chiqildi.
Mazkur tashabbus nafaqat hududning ekologik holatini yaxshilashga, balki aholi o‘rtasida tabiatga ehtiyotkorona munosabatni shakllantirishga xizmat qiladi. Shu bilan birga, bu kabi tadbirlar yosh avlodni tabiatni asrash va atrof-muhitni muhofaza qilishga undaydi.
Umuman olganda, Ziroat Mirziyoyevaning Xorazm viloyatiga tashrifi ijtimoiy himoya, ta’lim va ekologiya sohalarida amalga oshirilayotgan ishlarga yangi ruh va e’tibor bag‘ishladi.
