Foto: Prezident matbuot xizmati
Prezident Shavkat Mirziyoyev Margʻilon shahrida barpo etilgan “Burhoniddin Margʻinoniy” ilmiy-maʼrifiy va turizm majmuasi hududidagi yangi madaniy hamda xizmat koʻrsatish obyektlari bilan tanishdi. Ushbu loyiha nafaqat arxitekturaviy jihatdan, balki maʼnaviy va iqtisodiy ahamiyati bilan ham alohida eʼtiborga loyiq.
Qayd etilishicha, milliy meʼmorchilik anʼanalari, Margʻilonning boy tarixi va zamonaviy turizm talablari uygʻunlashgan mazkur majmua haqiqiy “shahar ichidagi shahar”ga aylangan. 35 gektar hududni qamrab olgan kompleksda sayyohlar uchun barcha zarur sharoitlar yaratilmoqda: mehmonxonalar, karvonsaroylar, savdo va servis binolari, hunarmandchilik markazlari, milliy bozorlar va muzeylar qurib bitkazilgan.
Majmuada buyuk alloma Burhoniddin Margʻinoniyning ilmiy merosini oʻrganish va targʻib qilish ustuvor yoʻnalishlardan biri sifatida belgilangan. Shu bilan birga, hududda qadimiy hunarmandchilik anʼanalarini saqlash, ziyorat va madaniy turizmni rivojlantirishga alohida eʼtibor qaratilmoqda.
Loyihaning eng diqqatga sazovor jihatlaridan biri — “Otabek va Kumush uyi” muzeyidir. Bu yerda mashhur “Oʻtkan kunlar” romani sahnalari devorlarda jonlantirilib, adabiyot va tarixni birlashtirgan oʻziga xos muhit yaratilgan. Shuningdek, maqom teatri, shoir va rassomlar xiyoboni hamda zamonaviy kutubxona ham majmua tarkibidan joy olgan.
Qiymati 1,7 trillion soʻmga teng boʻlgan ushbu yirik loyiha Turkiyaning “Studio Vertebra” kompaniyasi tomonidan ishlab chiqilgan bosh reja asosida amalga oshirilmoqda. Majmua ikki bosqichda barpo etiladi. Kelgusida bu yerda biznes markaz, 1500 oʻrinli masjid, yangi mehmonxonalar, 400 ta savdo va xizmat koʻrsatish nuqtalari hamda 300 oʻrinli bozor tashkil etilishi rejalashtirilgan.
Davlat rahbari qurilish va obodonlashtirish ishlarini koʻzdan kechirib, hunarmandchilik va amaliy sanʼat koʻrgazmalari, bozor rastalari bilan tanishdi. Shuningdek, mahalliy aholi va jamoatchilik vakillari bilan muloqot qilib, ularning fikr va takliflarini eshitdi.
Mutaxassislar taʼkidlashicha, majmua toʻliq faoliyat boshlagach, Fargʻona vodiysiga har yili 200–250 ming nafar xorijiy sayyoh jalb etilishi kutilmoqda. Bu esa 2 mingta yangi ish oʻrni yaratish, davlat budjetiga 52 milliard soʻm tushum hamda 30 million dollarlik xizmatlar eksportini taʼminlash imkonini beradi.
Shu bilan birga, mazkur tajriba mamlakatning boshqa tarixiy hududlarida ham joriy etilishi rejalashtirilgan. Jumladan, Buxorodagi “Boqiy Buxoro”, Samarqanddagi Imom Moturidiy majmuasi atrofi, Qoʻqondagi Oʻrda va Namangandagi “Axsikent” yodgorligi kabi maskanlarda ham shunday loyihalar amalga oshirilishi kutilmoqda.
Qisqacha aytganda, Margʻilondagi ushbu majmua — bu oddiy qurilish emas, balki tarix, madaniyat va iqtisodni bir nuqtada birlashtirgan strategik loyiha. Endi gap — uni qanday darajada “jonlantirish”da.
