O‘zbekiston xalqaro avto poygalar, jumladan, Formula-1 musobaqalarining bosqichlarini o‘tkazishga qiziqish bildirdi, deb xabar berdi davlat rahbari matbuot xizmati. Ushbu masala prezident Shavkat Mirziyoyev va Xalqaro avtomobil federatsiyasi (FIA) rahbari Muhammad bin Sulayem o‘rtasida muhokama qilindi.
Uchrashuv davomida tomonlar avtosportni rivojlantirish masalalarini ham ko‘rib chiqdilar. O‘zbekistonlik muhandislar, mexaniklar va poygachilarni tayyorlash uchun FIA universiteti jalb etilishi rejalashtirilmoqda.
Mirziyoyev va bin Sulayem O‘zbekistonda avtosport uchun zamonaviy infratuzilma yaratish zarurligini ta’kidladilar. O‘zbekiston 2019-yildan beri federatsiya faoliyatida faol ishtirok etib kelmoqda.
O‘tgan yili Samarqandda FIA tashkilotining 120 yilligiga bag‘ishlangan yubiley Bosh assambleyasi bo‘lib o‘tgan edi. Joriy yilning 12 dekabr kuni Humo Arena majmuasida eng yaxshi poygachilarni taqdirlash marosimi o‘tkazilishi rejalashtirilgan.
Mehmon guruhidagi foydalanuvchilar ushbu nashrga izoh qoldira olmaydi.
