«Al-Nasr» bosh murabbiyi Jorje Jezush Krishtianu Ronalduning navbatdagi uchrashuvda maydonga tushmasligi sababini tushuntirdi. Bu haqda euro-football.ru xabar beradi.
Ar-Riyod klubi chorshanba kuni OFK Chempionlar ligasi doirasida «Arkadag»ga qarshi o'ynaydi. Portugaliyalik yulduz forvardning tez orada maydonga qaytishi kutilayotgandi, biroq bu safar ham u qaydnomadan joy olmaydi.
«Zich taqvim sabab Ronalduni va asosiy tarkibdagi ayrim futbolchilarni dam oldirishni ma'qul ko'rdik. Oldinda «Al-Fateh»ga qarshi juda muhim o'yin bor», — deya Jezushning so'zlarini keltiradi Al Nassr Zone.
Murabbiy ta'kidlashicha, Ronalduning safar o'yinlarini o'tkazib yuborishi yangilik emas: u Saudiya Arabistonidan tashqarida bo'ladigan uchrashuvlarda bir necha bor qatnashmagan.
Saudiya chempionati doirasidagi «Al-Fateh» — «Al-Nasr» bahsi shanba, 14-fevral kuni bo'lib o'tadi.
“Zamin”ni Telegramʻda oʻqing!
