Sharhlovchi Aleksandr Elagin APLning 27-turida «Tottenhem»ning «Arsenal»dan yirik hisobda mag‘lub bo‘lganidan so‘ng o‘z fikrlarini bildirib o‘tdi. Bu haqda euro-football.ru xabar beradi.
«Shporlar»ning o‘z maydonidagi uchrashuv 1:4 hisobida «kanonirlar» foydasiga yakunlandi. Elagin avvalroq Jeymi Karrager aytgan fikrni ham eslatdi: uningcha, «Tottenhem» pastga qulab, hatto ligadan tushib ketish xavfi bor va bunday holat so‘nggi yarim asrdagi ingliz futboli uchun eng katta fojealardan biriga aylanishi mumkin.
«Bu o‘yinda “Arsenal” qoyadek edi. “Tottenhem” esa etik ichidagi mayda toshday. Afsus. Siz esa asosan hakam haqida gapiryapsiz», — deya Elagin Telegram’dagi obunachilariga murojaat qildi.
Uning ta’kidlashicha, «Tottenhem» himoyasi juda sodda o‘ynayapti va ahvoli achinarli. 27 turdan keyin londonliklar 29 ochko bilan turnir jadvalida 16-o‘rinda bormoqda.
“Zamin”ni Telegramʻda oʻqing!
