2025 yil 9 dekabr kuni «O‘zelektrotexsanoat» uyushmasi va Janubiy Koreyaning Robotis kompaniyasi O‘zbekistonda humanoid robotlar ishlab chiqarish bo‘yicha memorandum imzoladi. Loyihani amalga oshirish uchun Toshkentda 66 ming kvadrat metr maydon ajratilishi rejalashtirilgan.
Shuningdek, hujjatda yangi soha uchun kadrlar tayyorlash tizimini rivojlantirish masalasi ham ko‘zda tutilgan. Ishlab chiqarishni yo‘lga qo‘yish borasidagi muzokaralar o‘zbek-koreys davra suhbati doirasida bo‘lib o‘tdi.
Tadbirda O‘zbekiston hukumati vakillari, jumladan, bosh vazir o‘rinbosari Jamshid Xo‘jayev boshchiligidagi delegatsiya ishtirok etdi. Maeil Business Newspaper nashrining yozishicha, O‘zbekiston ushbu tashabbusni qo‘llab-quvvatlash uchun davlat dasturlariga birinchi darajada e’tibor qaratishga tayyor.
1999 yilda Seulda tashkil etilgan Robotis kompaniyasi robototexnika uskunalari, jumladan, modulli «aqlli» drayvlarni ishlab chiqish va ishlab chiqarishga ixtisoslashgan. So‘nggi yillarda kompaniya avtonom xizmat robotlari, jumladan, kuryer robotlarini yaratish bilan shug‘ullanmoqda.
Mehmon guruhidagi foydalanuvchilar ushbu nashrga izoh qoldira olmaydi.
