Президент мектепте кемсітілген қызды қолынан ұстап, мектепке өзі алып барды

Солтүстік Македонияның Гостивар қаласында 2022 жылдың ақпан айында әсерлі оқиға болды. 11 жастағы Эмбла Адеми мектепте ата-аналар мен кейбір сыныптастары тарапынан кемсітілді.

Даун синдромы бар Эмбланың өз балаларымен бір сыныпта оқуына кейбір ата-аналар қарсы шықты. Олар қыздың сабақ барысына кедергі келтіріп жатқанын айтып, бойкот ұйымдастырды. Алайда бұл айыптаулардың негізсіз екені айтылды.

Нәтижесінде қыз сыныптастарынан бөлініп, сабақтарды жалғыз оқуға мәжбүр болды. Оқиға жұртшылыққа белгілі болған соң, ел президенті Стево Пендаровски оған бейжай қарамады.

Президент Эмбланың үйіне барып, оған сыйлықтар табыс етті. Кейін қыздың қолынан ұстап, оны мектепке дейін өзі алып барды. Бұл әрекетті көпшілік ерекше қажеттіліктері бар балаларды қолдаудың белгісі ретінде қабылдады.

Пендаровски инклюзивті білім берудің әрбір бала үшін маңызды екенін атап өтті. Ол кемсітуге жол бергендердің әрекетін ақтауға болмайтынын айтты.