«Ман Сити» жартылай қорғаушысы Фил Фоден Еуропа чемпионаты алдында өз бейнесін жаңартты. Футболшы шашын ақ түске бояп, Англия құрамасының бұрынғы жұлдызы Пол Гаскойнның Еуро-96 турниріндегі келбетін қайталады.
Бұл туралы Goal.com хабарлайды.
Фоденнің айтуынша, ол ұзақ уақыт бойы бір қалыпты шаш үлгісімен жүргендіктен, жаңалық енгізуге шешім қабылдаған. Футболшы өзінің жаңа бейнесі әлеуметтік желілерде Гаскойн және Эминеммен салыстырылып жатқанына таңданысын білдірді.
«Гаскойнның ел үшін қаншалықты маңызды тұлға болғанын жақсы білемін. Егер алаңда оның ойын мәнерінен үлгі көрсете алсам, бұл команда үшін өте пайдалы болар еді», — дейді 21 жастағы жартылай қорғаушы.
Англия құрамасының жанкүйерлері Фоденнің бұл өзгерісі командаға сәттілік әкеледі деп үміттенеді. Гаскойн 25 жыл бұрын дәл осындай шаш үлгісімен ағылшындарды жартылай финалға дейін бастап барған болатын.
Фил Фоден аяқталған маусымда Англия Премьер-лигасы мен Лига кубогында жеңіске жетті. Сондай-ақ, ол Кәсіби футболшылар қауымдастығы тарапынан жылдың үздік жас ойыншысы деп танылды.
“Zamin”-ді Telegram-нан оқыңыз!
