Бундеслиганинг шанба кунги учрашувида «Бавария» ҳужумчиси Гарри Кейн «Вердер» дарвозасига икки бор гол уриб, жамоасининг 3:0 ҳисобидаги ғалабасига катта ҳисса қўшди. Англиялик форвард 22-дақиқада пенальтини аниқ ижро этди, 25-дақиқада эса ўйиндан гол киритди. Бу ҳақда euro-football.ru хабар беради.
32 ёшли футболчининг жорий Германия чемпионатидаги натижаси ҳам эътиборга молик: мавсум якунига 12 тур қолган пайтда унинг ҳисобида 26 та гол бор. Шу фонда журналистлар Кейндан Роберт Левандовскининг 41 голлик рекордини янгилаш имконияти ҳақида сўрашди.
«Ҳаммаси бўлиши мумкин, лекин ҳозирча бу натижадан анча узоқдаман. Бу рекорд — ақлбовар қилмас даражада. Ҳозир яхши формаман ва жамоага фойда келтира олаётганимдан хурсандман. Апрелда ўзимни қандай ҳис қилишимни кўрамиз — шундан кейин рекорд ҳақида ўйлайман. Ҳозир эса кейинги ўйинга эътибор қаратиш керак», — дея Кейннинг сўзларини Bayern & Germany келтирди.
Қайд этилишича, Кейннинг «Вердер»га урган иккинчи голи мюнхенликлар юлдузи фаолиятидаги 500-гол бўлди.
“Zamin”ни Telegram'да ўқинг!
