Ilon Maskning talablari AQSH amaldorlari tomonidan sabotaj qilinmoqda: vaziyat nima bilan tugaydi?

AQSH Davlat samaradorligi departamenti rahbari Ilon Maskning amaldorlardan hafta davomida bajarilgan ishlar haqida yozma hisobot taqdim etishga oid buyrug‘i mamlakatning ko‘plab idoralari tomonidan ochiqdan-ochiq sabotaj qilinmoqda. Qolganlari esa uni faqat rasmiyatchilik uchun bajaryapti, deya xabar bermoqda The Washington Post nashri.

Eslatib o‘tamiz, Mask 22 fevral kuni davlat xodimlaridan har hafta bajargan ishlari bo‘yicha yozma hisobot talab qilgan edi. Federal agentliklarga yuborilgan maktublarda har bir ishchi bir hafta davomida bajarilgan beshta vazifani qayd qilishi so‘ralgan. Shu bilan birga, Mask hisobotni taqdim etmaslikni «iste’foga chiqish» sifatida baholashini ham ogohlantirgan.

Biroq ayrim idoralar boshidanoq ushbu talablarni bajarishni rad etgan. Xususan, buyruqdan ikki kun keyin hukumat apparati yuqori mansabdorlari bilan bo‘lgan yig‘ilishda kadrlar xizmati boshqarmasi vakillari bu talablarni ixtiyoriy deb hisoblashini, xodimlar tomonidan yuborilgan xatlarga e’tibor berilmasligini aytgan.

Umuman olganda, Maskning ushbu tashabbusi kuchli qarshiliklarga sabab bo‘ldi. Xatto sobiq prezident Donald Trampning eng yaqin maslahatchilari va Amerika vazirlaridan ham keskin tanqidlar yangradi. Natijada Oq uy ham ko‘p o‘tmay ushbu hisobotlarni talab qilishni vazirlarning shaxsiy xohishiga qoldirdi.

The Washington Post nashrining ta’kidlashicha, Maskning hisobot talablari davlat organlarida izchil ravishda bajarilmayapti. Ba’zi agentliklar bu talablarni butunlay bekor qilgan, ayrimlari esa ularni so‘ramoqda, biroq hisobotlarning mazmuniga umuman e’tibor qaratmayapti. Hisobotni muntazam yuborib turadigan ko‘plab amaldorlar esa har hafta bir xil matnni takrorlab yuborish bilan cheklanmoqda.

Atrof-muhitni muhofaza qilish agentligi mart oyi oxirida xodimlarga hisobot berish «rag‘batlantirilishi, ammo majburiy emasligi»ni ma’lum qilgan bo‘lsa, Milliy sog‘liqni saqlash institutlari apreldan boshlab bu hisobotlarga hojat qolmaganini va agentlikning o‘zini baholash mexanizmlari mavjudligini e’lon qildi.

Qishloq xo‘jaligi vazirligi esa dastlab xodimlariga xatlarga javob berish shart emasligini aytgan, keyinchalik bu mumkinligi, keyin esa bu talab zarurligi, ammo qat’iy emasligi haqida ko‘rsatma bergan. Bunga javoban ba’zi xodimlar hisobotlarni rus tilida yozish orqali jarayonni ataylab «chalkashtirish»ga harakat qilgan.

Biroq ayrim idoralar hisobot yig‘ish jarayonini jiddiy qabul qilib, hatto maxsus formalar ishlab chiqishgan. Masalan, Qimmatli qog‘ozlar va birjalar komissiyasi (SEC) muntazam ravishda xodimlarga har kuni hisobot yuborishni eslatib turadi. Mudofaa vazirligi ham har hafta payshanba yoki juma kunlari xodimlarga keyingi seshanba kuniga qadar hisobotlarni taqdim etish kerakligini eslatadi.

Biroq hisobotlarni qanday qilib tahlil qilish va qayta ishlash bo‘yicha aniq strategiya mavjud emas. Hisobotlarning kelgusi taqdiri noma’lumligicha qolmoqda, deb yozadi The Washington Post.

Qizig‘i, Ilon Mask rahbarlik qiluvchi xususiy kompaniyalarda bunday hisobotlar keng tarqalgan amaliyot bo‘lib, ular yuqori samaradorlik madaniyatini shakllantirish va kadrlar qarorlarini qabul qilishda asosiy vosita hisoblanadi. Nashr ekspertlarining fikricha, agar davlat apparati yanada qisqartirilsa, bu hisobotlarning mazmuni amaldorlarni ishdan bo‘shatishni oqlash uchun qo‘shimcha sabab bo‘lib xizmat qilishi mumkin.

Ayni paytda, The Washington Post gazetasining qayd etishicha, Maskning hukumatdagi ta’siri sezilarli darajada kamaymoqda. Uning maxsus davlat xizmatchisi maqomi may oyi oxirida tugaydi. Maskning yaqinlaridan biri nashrga uning «siyosiy so‘llarning doimiy jirkanch va axloqsiz hujumlari» sababli hukumatdan ketishga tayyor ekanini aytgan.

Hozircha ushbu qiziq vaziyatning qanday yakuniga yetishi noma’lum, ammo bu boradagi muhokamalar AQSH jamoatchiligi orasida qizg‘in davom etmoqda. “Zamin”ni Telegramʻda oʻqing!