1 sentyabr kuni Xitoyning Tyanszin shahrida “Shanxay hamkorlik tashkiloti plyus” formati doirasidagi muhim uchrashuvlar nafaqat davlat va hukumat rahbarlari, balki ularning turmush o‘rtoqlari uchun ham o‘ziga xos madaniy dasturlar bilan yodda qoldi. Mezbonlikni Xitoy Raisi Si Szinpinning rafiqasi Ping Liyuyen amalga oshirdi.
U dastlab mehmonlarni iliq va samimiy kutib oldi. Birinchi xonimlar madaniy dastur boshlanishidan oldin oilaviy suratga tushib, o‘zaro samimiy muloqot qildi. Dasturning ilk qismida turli mamlakatlar vakillari o‘z davlatlari madaniy merosi, an’anaviy qimmatliklari va tarixiy yutuqlari haqida qiziqarli ma’lumot almashdi. Bu jarayon nafaqat do‘stona muhitni kuchaytirdi, balki xalqlar o‘rtasidagi ma’naviy yaqinlikni ham yanada mustahkamladi.
Shundan so‘ng birinchi xonimlar uchun Xayxe daryosi bo‘ylab maxsus kema sayri tashkil etildi. Daryo sohilidagi manzaralar, shaharning zamonaviy va tarixiy qiyofasi mehmonlarga katta taassurot qoldirdi.
Tadbirda Nepal, Armaniston, Malayziya, Mo‘g‘uliston, Ozarbayjon, Eron, Misr, Turkiya va O‘zbekiston rahbarlarining rafiqalari, shuningdek Eron Prezidentining qizi ham ishtirok etdi. Bu sayohat ishtirokchilar uchun nafaqat madaniy hodisa, balki mamlakatlar o‘rtasidagi do‘stlik va hamkorlik ramzi sifatida ham ahamiyat kasb etdi.
Shu tariqa, Tyanszindagi madaniy dasturlar “SHHT plyus” sammitiga o‘ziga xos rang-baranglik bag‘ishlab, birinchi xonimlar o‘rtasida samimiy muloqot va do‘stona munosabatlarni yanada mustahkamladi.
“Zamin”ni Telegramʻda oʻqing!
