O‘zbekiston aholisini 6 sentyabr kuni katta tabiiy sinov kutib turibdi. Meteonova xabariga ko‘ra, mamlakatimizda “apelsin darajali” kuchli magnit bo‘roni qayd etilishi kutilmoqda.
Ma’lumotlarga qaraganda, geomagnit buzilishlar darajasi 5 ballga yetadi. Bu — o‘rtadan yuqori xavf darajasi hisoblanadi. Mutaxassislarning aytishicha, eng kuchli ta’sir 08:00 va 11:00 orasida kuzatiladi. Shu vaqtda quyosh shovqinlari yuqori cho‘qqiga chiqishi, kechga borib esa asta-sekin pasayishi kutilmoqda.
Magnit bo‘ronlari inson organizmiga turlicha ta’sir qiladi. Ayniqsa, yurak-qon tomir kasalliklari, asab tizimi muammolari, diabet yoki bronxial astma bilan og‘rigan bemorlar uchun bu davr og‘ir kechishi mumkin. Bundan tashqari, ob-havo o‘zgarishiga sezgir odamlar, bosh og‘rig‘i yoki bosimning ko‘tarilishiga moyil shaxslar ham bunday kunlarda qiyinchilikka duch keladi.
Meteopatiya deb ataladigan holat — ya’ni ob-havo sharoiti bilan bog‘liq og‘riq va noqulayliklar — aynan shunday kunlarda ko‘proq namoyon bo‘ladi. Ko‘plab odamlarda bosh aylanishi, uyqusizlik, ish qobiliyati pasayishi va asabiylik kuchayishi mumkin.
Mutaxassislar imkoni boricha bunday kunlarda ortiqcha yuklama olmaslik, ko‘proq dam olish, sog‘lom ovqatlanish va toza havoda yurishni tavsiya qiladi. Shuningdek, shifokorlar dorilarini o‘z vaqtida qabul qilish va kutilmagan holatlarga tayyor turish muhimligini alohida qayd etmoqda.
Kutilgan magnit bo‘roni tabiatning inson salomatligiga qay darajada ta’sir ko‘rsatishini yana bir bor eslatib o‘tmoqda. Shunday ekan, sog‘lig‘i zaif va ob-havo o‘zgarishlariga sezgir odamlar albatta ehtiyot bo‘lishi lozim.
“Zamin”ni Telegramʻda oʻqing!
