Xitoy dunyodagi ilk suzuvchi baliq fermasini ishga tushiradi!

Xitoyda dunyo tarixida birinchi marta losos baliqlarini yetishtirishga mo‘ljallangan yirik, zamonaviy va innovatsion suzuvchi baliqchilik kemasi qurilmoqda. Bu o‘ziga xos ferma Su Hai №1 nomini olgan bo‘lib, yaqin orada buyurtmachiga topshiriladi. Loyihaning katta maqsadi – mamlakatda losos balig‘iga bo‘lgan talabni to‘liqroq qondirishdir.

Bu g‘aroyib kemaning uzunligi qariyb 250 metrni tashkil etadi va u Xitoyning Guanchjou shahridagi mashhur Huangpu Wenchong Shipyard verfida qurilmoqda. Qurilish jarayoni zamonaviy texnologiyalar bilan boyitilgan va qurilishning umumiy qiymati 600 million yuanga (taxminan 83,6 million AQSH dollari) baholangan.

Suzuvchi ferma konsepsiyasi Jiangsu Lianshen Marine Technology kompaniyasining tashabbusi bilan amalga oshirilmoqda. Ushbu kompaniya vakillarining ma’lum qilishicha, kemada yil davomida taxminan 8000 tonna losos balig‘i yetishtirish rejalashtirilgan. Bu ko‘rsatkich baliqchilik sohasidagi haqiqiy texnologik inqilob sifatida baholanmoqda.

An’anaviy dengiz baliqchilik fermalaridan farqli ravishda, Su Hai №1 suzuvchi ferma kemasi tabiatdagi har qanday favqulodda vaziyatlarga ham tayyor bo‘ladi. Masalan, kuchli tayfun, bo‘ron yoki dengizda zararli suv o‘tlari gullash holati kuzatilganda, kemani xavfsizroq hududlarga tezda ko‘chirish mumkin bo‘ladi. Shu orqali, baliqlarning xavfsizligi va sifatli mahsulot ishlab chiqarishning barqarorligi ta’minlanadi.

Buningdan tashqari, kemada baliqni qayta ishlash jarayonlari uchun ham zamonaviy uskunalar joylashtirilgan. Ya’ni losos baliqlarini ushlashdan tortib ularni to‘liq qayta ishlashgacha bo‘lgan barcha jarayonlar aynan kemaning o‘zida amalga oshiriladi. Bu esa baliqchilik sohasida ham vaqt, ham moliyaviy resurslarni tejashga imkon yaratadi.

Xitoy hozirda ichki bozor talabini to‘liq qoplay olmaganligi sababli, losos balig‘ini asosan xorijdan import qilishga majbur bo‘lib keladi. Statistika ma’lumotlariga ko‘ra, mamlakatda iste’mol qilinadigan losos balig‘ining 80 foizi xorijdan, asosan Norvegiya va Chili davlatlaridan keltiriladi. Masalan, 2023 yilning o‘zida Xitoy 100 ming tonnadan ortiq losos import qilgan va mutaxassislarning taxminlariga ko‘ra, 2030 yilga kelib bu ko‘rsatkich ikki barobar ortib, 200 ming tonnaga yetishi mumkin.

Aynan shu sababli, Xitoy hukumati ichki bozor talabini qondirish uchun losos yetishtirish sohasini yanada rivojlantirishga alohida e’tibor qaratmoqda. Su Hai №1 suzuvchi baliqchilik fermasi esa bu sohadagi strategik qadamlardan biri sifatida ko‘rilmoqda. Kema Sariq dengiz hududida faoliyat ko‘rsatib, mamlakatning losos balig‘i bo‘yicha importga bog‘liqligini kamaytirishga yordam beradi.

Mazkur innovatsion loyiha jahon baliqchilik sanoati uchun ham yangi yo‘nalish ochishi mumkin. Agar bu tajriba muvaffaqiyatli bo‘lsa, boshqa mamlakatlar ham baliqchilik sohasida suzuvchi ferma texnologiyasini qo‘llashni boshlashlari ehtimoldan yiroq emas.

Demak, Xitoyning bu yangi va innovatsion loyihasi nafaqat mamlakat ichidagi talabni qondirishga, balki butun dunyoda baliqchilik sohasini rivojlantirishga xizmat qilishi mumkin. Bu esa soha uchun haqiqiy inqilob sifatida baholanishi mumkin.

Bu kemaning iyun oyida tantanali topshirilishi kutilmoqda va u orqali Xitoy dengiz mahsulotlari bozorida yangi bosqichga ko‘tariladi. Bugungi kunda dunyo hamjamiyati ushbu tarixiy loyihani katta qiziqish bilan kuzatmoqda. “Zamin”ni Telegramʻda oʻqing!